Në shenjë mbështetjeje në përvjetorin e tretë të pushtimit të Ukrainës nga Rusia, presidentja e Komisionit Evropian, Ursula von der Leyen dhe presidenti i Këshillit Evropian, Antonio Costa kanë mbërritur, sot në Kiev.

Von der Leyen tha se ishte në Kiev sepse “Ukraina është Evropë”.

“Në këtë luftë për mbijetesë, nuk është vetëm fati i Ukrainës që është në lojë. Është edhe fati i Evropës”, ka shkruar Von der Leyen në X.

Ndryshe Bashkimi Evropian ka thirrur një samit të jashtëzakonshëm për Ukrainën dhe sigurinë evropiane për datën 6 mars.

Ky lajm u bë i ditur nga presidenti i Këshillit Evropian Antonio Costa në një postim në rrjetin social X.

“Kam vendosur të mbledh një këshill të posaçëm evropian më 6 mars. Ne po jetojmë në një moment vendimtar për Ukrainën dhe sigurinë evropiane,” ka shkruar ai, duke shtuar se në konsultimet e tij me liderët evropianë ai kishte dëgjuar një “angazhim të përbashkët” për t’u përballur me sfidat në nivel të BE-së.

Derisa presidenti i SHBA-së Donald Trump filloi negociatat me Rusinë pa Ukrainën dhe Evropën, dhe e quajti liderin ukrainas “diktator”, pasi Kievi nuk mbajti zgjedhje në vitin 2024, për shkak të agresionit ushtarak rus.

Presidenti i Ukrainës Volodymyr Zelensky njoftoi se është gati të largohet nga presidenca nëse kjo do të thotë paqe për Ukrainën, duke bërë shaka se largimin e tij mund ta shkëmbejë me hyrjen e vendit të tij në NATO.

Ukraina është në luftë prej 24 shkurtit të vitit 2022 – kur Rusia filloi agresionin.

Gjatë kësaj periudhe janë shkatërruar shumë zona të Ukrainës si dhe kanë vdekur dhjetëra mijëra ushtarë dhe civilë.