Të martën u dëgjuan të shtëna me armë zjarri pranë ndërtesës ku ndodhet konsullata izraelite në Stamboll.

Konsullata ndodhet në lagjen Besiktas të Stambollit. Mbetet e paqartë në këtë kohë nëse konsullata ishte shënjestër gjatë incidentit.

Konsullata ka qenë e mbyllur për të paktën dy vjet dhe ka të ngjarë të mos ketë personel, informoi një anëtar i komunitetit vendas për The Jerusalem Post .

Një zëdhënës i Ministrisë së Jashtme të Izraelit deklaroi se incidenti është nën hetim dhe konfirmoi se konsullata aktualisht nuk ka personel.

Tre persona u vranë dhe dy oficerë policie u plagosën në incident, thanë raportet e mediave.

VIDEO

Sipas televizionit turk NTV dhe atij në gjuhën turke të CNN, tre personat e vrarë ishin sulmuesit që u qëlluan nga forcat turke të sigurisë.

Pamjet video të para nga Reuters tregonin një oficer policie që nxirrte një armë dhe fshihej ndërsa dëgjoheshin të shtëna. Një person shihej i mbuluar me gjak.

Një prani e fortë e policisë së armatosur mbahet gjithmonë në zonën pranë konsullatës izraelite, vuri në dukje Reuters. Pamjet televizive treguan policë të armatosur që patrullonin në zonë pas të shtënave.

Ministri turk i Drejtësisë, Akin Gurlek, deklaroi se ka caktuar tre hetues për të hetuar incidentin, duke pranuar se ndodhi jashtë konsullatës izraelite, ndërsa nuk komentoi nëse incidenti ishte me natyrë antisemite apo antisioniste./Lajmi.net/