Një përleshje mes tre personave ka ndodhur të mërkurën në Suharekë, ku si pasojë dy persona kanë pësuar lëndime trupore dhe kanë marrë trajtim mjekësor.

Sipas raportit 24-orësh të Policisë së Kosovës, rasti ka ndodhur më 10 qershor 2026, rreth orës 18:50, pas një mosmarrëveshjeje mes tre të dyshuarve.

“Dyshohet se pas një mosmarrëveshje janë përleshur mes veti tre të dyshuar meshkuj kosovarë. Si pasojë dy të dyshuar kanë pësuar lëndime trupore dhe kanë pranuar tretman mjekësor. Njëri prej të dyshuarve ka dëmtuar me një mjet të fortë veturën e të dyshuarit tjetër”, thuhet në raportin e Policisë.

Policia njofton se me urdhër të prokurorit është kryer kontroll në shtëpinë e njërit prej të dyshuarve, mirëpo nuk është gjetur asgjë e dyshuar.

“Me urdhër të prokurorit është kontrolluar shtëpia e njërit prej të dyshuarve por nuk është gjetur asgjë e dyshuar. Dy prej të dyshuarve janë arrestuar dhe me vendim të prokurorit janë dërguar në mbajtje, kurse i dyshuari i tretë është liruar në procedurë të rregullt”, thuhet më tej në njoftim.

Lidhur me rastin është iniciuar hetim për veprat penale “Armëmbajtje pa leje”, “Lëndim i lehtë trupor” dhe “Dëmtim prone”. /Lajmi.net/