Po i pëlqejnë Iniciativat Qytetare, të cilat do të marrin pjesë në zgjedhjet lokale të 3 nëntorit. Thotë se ato janë shprehje e vullnetit të  njerëzve për të bërë ndryshime. Për më shumë, ndryshimet po i kërkon edhe vetë Jakup Krasniqi, dikur një ndër njerëzit më me ndikim në Partinë Demokratike të Kosovës, përball së cilës do të konkurrojnë Iniciativat Qytetare në Malishevë, Drenas e Prizren.

“Pa marrë parasysh se a kam ndonjë lidhje apo nuk kam, unë i mbështes të gjitha iniciativat qytetare të cilat kanë për qëllim përmirësimin e qeverisjes, qoftë në nivelin lokal apo qendror”.

Pas mbledhjes së Kryesisë së Kuvendit, Kryeparlamentari Krasniqi ka shprehur kritika edhe ndaj Ligjit për Amnestinë, të miratuar kohë më parë në Kuvendin e Kosovës.

Ai tha se ky ligj duhet të vijë në Zyrën ligjore të Kuvendit, në mënyrë që administrata e Kuvendit ta pastrojë nga ato nene dhe t’i shkojë presidentes për nënshkrim.

Krasniqi, ndërkaq, nuk ka dashur të komentojë pjesëmarrjen e përbashkët të serbëve në zgjedhje, me listën me emrin “Srbija”. Për këtë, ai ka sugjeruar gazetarët që të pyesin ata që kanë marrë pjesë në bisedimet e mbajtura në Bruksel.