Komisioni Qendror i Zgjedhjeve ka përmbyllur numërimin e votave me postë në Qendrën e Numërimit dhe Rezultateve (QNR) për zgjedhjet e jashtëzakonshme parlamentare të 28 dhjetorit 2025. Sipas rezultateve të fundit, Lëvizja Vetëvendosje ka marrë 72.20% të votave me postë apo 19.344 vota, duke qëndruar në krye të garës.

Nga të dhënat zyrtare, Lidhja Demokratike e Kosovës (LDK) ka siguruar 10.15%, apo 2.720 vota, ndërsa Partia Demokratike e Kosovës (PDK) ka marrë 9.56%, ose 2.560 vota nga votat me postë.

KQZ ka njoftuar se sot do të nisë numërimi i votave me kusht dhe atyre të personave me nevoja të veçanta, të cilat do të përfshihen në përditësimet e ardhshme të rezultateve.

Ndërkohë, rreth 20,000 pako me fletëvotime janë tërhequr nga kutitë postare jashtë Kosovës dhe pritet të mbërrijnë në Qendrën e Numërimit dhe Rezultateve gjatë ditëve në vijim. Këto vota janë pjesë e votimit me postë dhe konsiderohen të fundit që mbeten për numërim në këtë fazë të procesit.

Në një njoftim zyrtar, KQZ ka shprehur pritshmërinë që numërimi i të gjitha votave të përfundojë gjatë kësaj jave, përfshirë edhe votat e kushtueshme dhe ato të personave me nevoja të veçanta, në përputhje me procedurat e parashikuara ligjore. /Lajmi.net/