Lidhja Demokratike e Kosovës (LDK) ka kritikuar qeverisjen e PDK’së, duke thënë se premton rritje të pagave në kohën kur rritja e çmimit të disa herë më e madhe.

Me një komunikatë për media, ekspertë të kësaj partie kanë vlerësuar se rritja e çmimit të energjisë nga muaji prill, bashkë me rritjen e çmimeve të artikujve ushqimor, do të devalvojë rritjen e pagave për shërbyesit civil.

“Njësoj ndodhi edhe më 2011, kur rritja e pagave u shoqërua me rritje të TVSh-së nga 15% në 16%, tatimi në qarkullim për biznese të vogla nga 5% në 9%, dhe norma minimale e tatimit në pronë nga 0.05% ne 0.15%”.

“LDK-ja vlerëson se të gjithë qytetarët duhet të përfitojnë barabartë nga shteti. Bashkë me rritjen e pagave për shërbyesit civil, duhet të rriten pagesat për këto kategori që kanë shumë nevojë: Pensionet bazë për ata që i mbushin 65 vjet, Pensionet për personat me aftësi të kufizuara, Pensionet për invalidët e luftës, Pagesat për familjet e dëshmorëve,

“Pagesat për familjarët e të zhdukurve, Pagesat për familjen e invalidit të luftës pas vdekjes së invalidit,Familjarët e viktimave civile dhe Pagesat për fëmijët e braktisur”.

“Niveli i ndihmës që marrin këto kategori është tepër i ulët. Një familje 7 anëtarësh merr 80 euro në muaj, ndërkaq një i moshuar mbi 65 vjet merr pension bazë vetëm 60 euro”.

“LDK-ja vlerëson si të dështuar këtë model qeverisës të PDK-së, ku rritja e pagave bëhet një herë në tri vite dhe vetëm në kohë zgjedhjes”.