“PDK do të bëj koalicion me LDK-në, Kadri Veseli do të jetë kryeministër”

8:11 | 14 Gusht 2019

PDK do të bëj koalicion me LDK-në, ndërkaq që Kadri Veseli do të jetë kryeministër.

Kështu ka parashikuar sekretari i degës së PDK-së në Prishtinë, Bujar Cakolli, i cili njëherit është edhe zëvendësministër i Inovacionit, shkruan lajmi.net.

Përmes një postimi në Facebook, ai ka thënë se posti i kryeparlamentarit do t’i takojë LDK-së, e që me gjasë do të jetë Lutfi Haziri.

Ky është postimi i tij në Facebook:

LDK duke iu frikësuar një koalicioni të PDK-së me ndonjë parti tjetër, po e shantazhon skenën politike duke proklamuar një koalicion të mundshëm LDK – VV.

Mirëpo e vërteta është kjo. Tri subjektet më të mëdha politike PDK, LDK, VV do të shkojnë të vetme në zgjedhje parlamentare. Fitues i këtyre zgjedhjeve do të jetë PDK, kurse nën trysninë e faktorit ndërkombëtar, koalicioni i ardhshëm qeverisës do të jetë PDK – LDK në krye me kryeministrin Kadri Veseli. Kryetari i parlamentit i takon LDK-së dhe sipas të gjitha gjasave ai do të jetë Lutfi Haziri.

Isa Mustafa menjëherë pas zgjedhjeve do të jap dorëheqje nga posti i Kryetarit të LDK-së. /Lajmi.net/