Paneli Zgjedhor për Ankesa dhe Parashtresa, ka marrë vendim ndaj dy ankesave që janë parashtruar pas numërimit të të gjitha votave të zgjedhjeve të 7 qershor.

Këto dy ankesa që janë bërë nga kandidatët për deputetë të PDK-së, Bekim Haxhiu dhe Qëndrim Kryeziu të cilët kanë kërkuar rinumërim të votave të kandidatëve për deputetë brenda partisë, janë refuzuar si të pabazuara.

“Paneli vlerëson se qëllimi i mekanizmit të paraparë me nenin 3 të Rregullores Zgjedhore Nr.02/2026 është pikërisht verifikimi përmes një mostre përfaqësuese i saktësisë së procesit të numërimit dhe vlerësimi nëse rezultatet e kontrollit krijojnë nevojë për ndërmarrjen e masave shtesë të verifikimit. Vetë ktivizimi i këtij mekanizmi nuk krijon prezumim juridik se procesi i numërimit në tërësi ka qenë i pasaktë dhe as nuk mund të nënkuptohet me automatizëm si domosdoshmëri për zgjerimin e rinumërimit”, thuhet në arsyetimin e PZAP-së për marrjen e këtyre vendimeve.

Pas marrjes së këtyre vendimeve, KQZ ka thënë se po presin nëse për këto vendime palët do të bëjnë ankesë në Gjykatë Supreme, e më pas KQZ do të shpall rezultatet përfundimtare.

“Komisioni Qendror i Zgjedhjeve është në pritje të përfundimit të shqyrtimit të ankesave dhe vendimmarrjen e institucioneve përkatëse para se të procedojë me shpalljen e rezultateve përfundimtare të zgjedhjeve të parakohshme për Kuvendin e Kosovës. Mund t’iu konfirmoj se KQZ është njoftuar me vendimet e PZAPI-it lidhur me 2 ankesat e paraqitura në këtë institucion. Ndaj këtyre vendimeve të PZAP-it, palët kanë të drejtë ankese brenda 48 orëve në Gjykatën Supreme, andaj KQZ do të presë që vendimet të marrin formën e prerë. Pas plotëfuqishmërisë së vendimeve, mbetet të shihet nëse ato përmbajnë obligime konkrete për KQZ-në, për t’i zbatuar dhe pastaj për të proceduar me aktin e shpalljes së rezultateve përfundimtare”, ka thënë zëdhënësi i KQZ-së, Valmir Elezi për lajmi.net.

Numërimi i votave ka përfunduar më 17 qershor, ndërkaq brenda dy ditëve Qëndrim Kryeziu dhe Bekim Haxhiu kanë dorëzuar ankesat e tyre.

Tani janë edhe 48 orë kohë për ta që të mund të dorëzojnë përsëri ankesë në Gjykatë Supreme në lidhje me vendimet e PZAP-it. /Lajmi.net/