OVL-UÇK: Supremja rrëzoi udhëzimin diskriminues të Ministrisë së Hekuran Muratit

Lajme

28/10/2025 15:06

Organizata e Veteranëve të Luftës së Ushtrisë Çlirimtare të Kosovës (OVL-UÇK) ka përshëndetur vendimin e Gjykatës Supreme të Republikës së Kosovës, e cila ka shfuqizuar nenin e konsideruar diskriminues të Udhëzimit Administrativ Nr. 01/2025, që kufizonte të drejtën e veteranëve për kompensim financiar.

Në reagimin e saj, OVL-UÇK e ka quajtur këtë një “fitore të drejtësisë dhe të ligjit”, duke theksuar se vendimi i Gjykatës rikthen në vend një padrejtësi të bërë ndaj shumë veteranëve që, pavarësisht punësimit në sektorin privat, u ishin mohuar përfitimet ligjore nga skema e kompensimeve, transmeton lajmi.net.

“Gjykata Supreme ka konstatuar saktë se e drejta e veteranëve nuk mund të varet nga fakti nëse janë apo jo në marrëdhënie pune, por nga natyra e punëdhënësit, duke përjashtuar vetëm ata që paguhen nga buxheti i shtetit”, thuhet në njoftimin e OVL-UÇK-së.

Sipas organizatës, ky vendim është një konfirmim i qartë se ligji që mbron dinjitetin e luftëtarëve të lirisë nuk mund të deformohet me akte nënligjore, dhe se çdo përpjekje për kufizim të paarsyeshëm të të drejtave të veteranëve bie ndesh me Kushtetutën dhe me vlerat e luftës çlirimtare.

OVL-UÇK ka falënderuar Gjykatën Supreme për vendimmarrjen që e cilëson si “të drejtë dhe të guximshme”, duke theksuar se ajo kontribuon në forcimin e shtetit ligjor dhe në mbrojtjen e të drejtave të atyre që sakrifikuan për lirinë e Kosovës.

Reagimi i plotë:

Organizata e Veteranëve të Luftës së Ushtrisë Çlirimtare të Kosovës e përshëndet vendimin e Gjykatës Supreme të Republikës së Kosovës, e cila ka shfuqizuar nenin diskriminues të Udhëzimit Administrativ Nr.01/2025, që kufizonte të drejtën e veteranëve për kompensim financiar.

Ky vendim është një fitore e drejtësisë dhe e ligjit, sepse rikthen në vend një padrejtësi të bërë ndaj shumë veteranëve që, pavarësisht se janë të punësuar në sektorin privat, u ishin mohuar të drejtat ligjore të përfitimit nga skema e kompensimeve.

Gjykata Supreme ka konstatuar saktë se e drejta e veteranëve nuk mund të varet nga fakti nëse janë apo jo në marrëdhënie pune, por nga natyra e punëdhënësit, duke përjashtuar vetëm ata që paguhen nga buxheti i shtetit, ndërsa duke garantuar të drejtën për të gjithë ata që punojnë në sektorin privat.

Ky vendim është një konfirmim i qartë se ligji që mbron dinjitetin e luftëtarëve të lirisë nuk mund të deformohet me akte nënligjore dhe se çdo përpjekje për kufizim të paarsyeshëm të të drejtave të veteranëve është në kundërshtim me frymën e Kushtetutës dhe me vlerat e luftës sonë çlirimtare.

OVL UÇK falënderon Gjykatën Supreme për vendimmarrjen e drejtë dhe të guximshme, e cila kontribuon në forcimin e shtetit ligjor dhe në mbrojtjen e të drejtave të atyre që sakrifikuan për lirinë e Kosovës.