Organizata e Veteranëve të Luftës së Ushtrisë Çlirimtare të Kosovës (OVL‑UÇK) i ka dërguar një letër zyrtare grupeve parlamentare dhe deputetëve të Kuvendit, duke kërkuar shkarkimin urgjent të kryeparlamentarit të ri, Dimal Basha.

Kjo kërkesë vjen pas publikimit të një punimi akademik të vitit 2012, në të cilin Basha dhe bashkëautoreja maqedonase Jana Arsovska pretendojnë se UÇK‑ja ishte financuar edhe nga trafikantë të drogës dhe kishte lidhje me botën e krimit, transmeton lajmi.net.

Në punimin me titullin “Globalizing the Western Balkans: Transnational Crime, Fundamental Islam and Unholy Alliances”, autorët shkruajnë se “fondet për UÇK‑në vinin nga shqiptarë të zakonshëm në diasporë, por edhe nga trafikantët e drogës që operonin në Evropën Perëndimore dhe në Shtetet e Bashkuara”, dhe se “ata dërgonin persona të armatosur për të luftuar përkrah UÇK‑së dhe blinin armë në emër të saj”.

Pas reagimeve të ashpra, vetë Basha ka mohuar çdo përgjegjësi për përmbajtjen që lidhej me UÇK‑në. Ai e ka limituar kontributin personal në vetëm Kapitullin 3, i cili sipas tij trajtonte depërtimin e islamit fundamentalist në Evropën Juglindore dhe jo çështje që lidhen me UÇK‑në. Sipas tij, pjesa tjetër e punimit përmban qëndrime akademike të bashkëautorese Arsovska.

OVL‑UÇK ka reaguar me “indinjatë”, duke e cilësuar zgjedhjen e Bashës si kryetar Kuvendi si një fyerje ndaj historisë dhe sakrificës së UÇK‑së.

Sipas tyre, ish‑punimet akademike që përshkruajnë UÇK‑në si të përfshirë në krim të organizuar janë të papranueshme për një përfaqësues institucional.

Çfarë thuhej konkretisht në punim?

Artikulli i 2012-parqet UÇK‑në si një milici e nëntokës e lidhur me banda kriminale dhe trafikantë droge, duke cituar raste nga Gjermania, Italia, Belgjika dhe Republika Çeke që, sipas autorëve, sugjerojnë një lidhje.

Në njërin rast, thuhej se “bosi i ‘mafias shqiptare’ në Belgjikë” la fishekë para dyerve të anëtarëve të diasporës, si formë presioni për pagesën e “taksave vullnetare” për UÇK‑në.

Punimi vlerësonte se mbështetja për UÇK‑në nuk ishte thjesht financiare: trafikantët dërgonin edhe luftëtarë të armatosur që kontribuan në konflikt./lajmi.net/