Të Infektuar: 1110

Të Shëruar: 843

Të Vdekur: 30

Osmani takohet me përfaqësues të Kombeve të Bashkuara, flitet për sfidat socio-ekonomike

17:42 | 22 Maj 2020

Kryetarja e Kuvendit të Kosovës, Vjosa Osmani sot ka takuar Koordinatoren për Zhvillim të OKB-së, Ulrika Richardson dhe përfaqësues të Agjencive të Kombeve të Bashkuara në Kosovë të cilët i ka falënderuar për praninë, rolin aktiv dhe kontributin thelbësor në adresimin e sfidave socio-ekonomike gjatë pandemisë.

Osmani potencoi se kjo prani dhe ky partneritet është i rëndësishëm dhe me interes të madh për Kosovën, shkruan lajmi.net.

Ky është njoftimi i plotë i Kuvendit:

Kryetarja e Kuvendit, Vjosa Osmani u takua sot me Koordinatoren për Zhvillim të OKB-së, Ulrika Richardson dhe përfaqësues te Agjencive të Kombeve të Bashkuara në Kosovë.

Me këtë rast, Kryetarja Osmani e falënderoi Richardson dhe të pranishmit për rolin aktiv dhe kontributin thelbësor që Agjencitë e KB kanë dhënë në adresimin e sfidave socio ekonomike gjatë periudhës së pandemisë. Ajo vlerësoi lart përkushtimin për një menaxhim sa më efikas dhe human të kësaj situate.

“Angazhimi i UNKT dhe agjencive të KB gjatë kësaj periudhe është modeli më i mirë se si përmes partneritetit të mirëfilltë dhe të sinqertë mund t’ia dalim që me sukses të përballojmë situata të tilla të përmasave jashtëzakonisht sfiduese” – theksoi Osmani.

Nga ana e UNKT, Richardson potencoi që ishte shumë me rëndësi që masat janë ndërmarrë dhe para paraqitjes së rastit të parë në Kosovë, dhe që për shkak paraqitjes së mëvonshme të virusit në vend, institucionet kishin fatin të mësojnë nga eksperienca e vendeve të tjera.

Tutje, palët diskutuam rreth modaliteteve për angazhim të përbashkët në promovimin e Objektivave të Zhvillimit të Qëndrueshëm – OZHQ. U theksua se OZHQ-të kanë për qëllim prosperitetin e një shoqërie andaj duhet të ju kushtohet vëmendje e veçantë në mënyrë që kjo agjendë global të shënoj progres edhe në Kosovë.  Në mes tjerash, në frymën e muajit për rëndësinë e shëndetit mendor, në takim u përmend dhe rëndësia e kujdesit ndaj shëndetit mendor, me theks të veçantë në impaktin që ka pas përballja me pandeminë tek popullata dhe profesionistët shëndetësor. ​/Lajmi.net/