Omea Mehmeti, një vajzë 2-vjeçare nga Prishtina, po përballet me një sëmundje të rëndë në veshkë, për të cilën trajtimi i mëtejshëm nuk është i mundur në institucionet publike shëndetësore në Kosovë.

Të mërkurën, Shërbimi Spitalor i Kosovës ka rekomanduar trajtim urgjent jashtë vendit për Omean.

“Rekomandohet trajtim urgjent jashtë vendit”, thuhet në raportin e Klinikës së Kirurgjisë Pediatrike në QKUK, të nënshkruar nga drejtori i kësaj klinike, Sejdi Statovci.

Babai i Omeas, Valdrin Mehmeti, ka bërë të ditur përmes një njoftimi se mjekët kanë këshilluar transferimin urgjent të vajzës së tij në Francë, për një ekzaminim të specializuar.

“Omea Mehmeti, një vajzë e mrekullueshme 2-vjeçare nga Prishtina, po përballet me një betejë të rëndë për shëndetin e saj. Për dy vite, ajo ka kaluar disa operacione për trajtimin e veshkëve, por fatkeqësisht pa sukses!”, shkruan ai në një postim në rrjetet sociale.

Sipas tij, jeta e vajzës është bërë e varur nga medikamentet kundër dhimbjeve.

“Herën e fundit, mjekët në QKUK kanë këshilluar që Omea duhet të transferohet urgjentisht në Francë për një ekzaminim të specializuar. Jeta e saj është bërë e varur nga medikamentet kundër dhimbjeve”, thuhet në njoftim.

Në pamundësi për të mbuluar shpenzimet e trajtimit, familja ka bërë thirrje për ndihmë financiare nga qytetarët.

Të dhënat për ndihmë financiare:

Banka: Raiffeisen Bank Kosovo
Swift Code: RBKOXKPR
Numri i llogarisë: 1501120002095029
Emri: Valdrin Mehmeti (Babai)
Tel: +383 45 622 221