Oda Amerikane: Krijimi i Gjykatës Komerciale, ndihmesë e madhe për operimin e bizneseve të vogla

Ndikimi dhe përfitimet nga themelimi i Gjykatës Komerciale për sektorin privat në Kosovë, si dhe përmirësimi i klimës së investimeve, ishin disa nga temat kyçe të cilat u diskutuan gjatë një forumi të organizuar nga Oda Ekonomike Amerikane në Kosovë dhe Programi i USAID për Drejtësi Komerciale me pjesëmarrës nga Kuvendi i Kosovës, Agjencia e Shteteve të Bashkuara për Zhvillim Ndërkombëtar (USAID) dhe sektori privat.

Lajme

21/10/2021 09:32

Doarsa Kica Xhelili, depute dhe kryesuese e grupit punues pranë Komisionit Parlamentar Legjislativ, ka theksuar rëndësinë e formimit të Gjykatës Komerciale dhe përmendi lehtësimin e operimit të bizneseve pas formimit të tij, njofton Klan Kosova.

Ajo tha se si kryesuese e këtij grupi punues konsideron se miratimi i ligjit për Gjykatën Komerciale është esencial për nivelin e vendit dhe për të lehtësuar proceset dhe zgjidhjet e shpejta të konteksteve, duke theksuar në veçanti trajtimin e barabartë që kjo Gjykatë u ofron të gjitha bizneseve.

Kica-Xhelili u shpreh se janë të gatshëm që ta shtyjnë votimin për themelimin e kësaj gjykate në një afat sa më të shpejtë, gjithmonë duke konsideruar edhe sugjerimet dhe komentet e institucioneve dhe organizatave përkatëse për themelimin dhe mbarëvajtjen e saj.

Këshilltarja Ligjore e Kryeministrit të Kosovës, Tea Blakaj-Hoxha, përmendi risitë në rast të themelimit të një gjykate të tillë. Sipas saj, Gjykata Komerciale do të jetë shembull edhe për gjykatat e tjera për mënyrën e menaxhimit dhe funksionimit të saj.

Përveç kësaj, ajo shtoi se objekti i ri, pas themelimit të kësaj gjykate, do të ketë rritje të numrit të gjyqtarëve të rinj dhe bashkëpunëtorëve professionalë.

‘’Gjykata Komerciale rrit transparencën dhe llogaridhënien’’, tha ajo.

Chris Thompson, Udhëheqës i Programit të USAID për Drejtësi Komerciale, përmendi rëndësinë e Gjykatës Komerciale në rritjen e vendeve të punës dhe krijimin e hapësires adekuate për investimet e huaja, e edhe ato vendore në Kosovë. Thompson tha se menaxhimi i vështirësive të gjykatës i vëzhguar nga komuniteti i biznesit, asistimimi i gjyqtarëve, shqyrtimi i rasteve në mes bizneseve dhe Qeverisë, si dhe adresimi i konteksteve në një adresë të vetme dhe të duhur janë disa nga lehtësimet që do i sillte themelimi i Gjykatës Komerciale.

Avokati nga Shita&Ibrahimaga, Ardi Shita, ka thënë se nuk ka zgjidhje më të mirë për përmirësimin e të bërit biznes se themelimi i Gjykatës Komerciale dhe kjo nuk vlen vetëm për shtetin e Kosovës, por edhe për vendet e tjera të rajonit.