Vendimi

Duke konfirmuar vendimin e qeverisë ruse të datës 13 gusht 2015, sipas të cilit Shqipëria është ndër 5 vendet e reja që përfshihen në “listën e zezë” të shteteve prej nga ndalohet importi në Rusi i prodhimeve bujqësore, Ambasada thekson edhe njëherë se ky vendim i Kremlinit parashikon vetëm ndalim të eksporteve shqiptare drejt Moskës, kryesisht lëndë të para bujqësore dhe ushqime, për shkak se Shqipëria u është bashkuar vendeve që kanë vendosur sanksione antiruse.

Vendimi i qeverisë ruse, sipas Ambasadës, është një hap i ndërmarrë në bazë të parimit të reciprocitetit dhe është një kundërmasë e Rusisë ndaj Shqipërisë, si një nga vendet që ka mbështetur vendimin e Këshillit të Bashkimit Europian, të datës 22 qershor 2015, për zgjatjen e sanksioneve ekonomike kundër Rusisë, për shkak të veprimeve destabilizuese të Moskës në Ukrainë, si dhe sanksioneve ekonomike kundër Krimesë dhe Sevastopolit. Të dyja këto vendime të Bashkimit Europian, Ambasada ruse në Tiranë i quan të paligjshme.

Eksporti grurit

Në fund, njoftimi për shtyp i Ambasadës së Federatës Ruse thekson se regjimi i eksportit të mallrave ruse, përfshirë edhe grurin, nuk preket nga vendimi i Kremlinit i datës 13 gusht dhe se nuk do të bëhet kurrsesi nga Rusia, duke dashur kështu të qetësojë edhe ata që janë shqetësuar nga një ndërprerje e mundshme e furnizmit të Shqipërisë me grurin rus.

Pak ditë më parë edhe ministri i Bujqësisë, Edmond Panariti ka reaguar për embargon ruse ndaj produkteve shqiptare, duke deklaruar se Shqipëria ka një vit që ndodhet nën embargon ruse. “Shqipëria ka një vit që ndodhet nën embargon ruse. Ndryshimi është se atëherë u motivua kinse si shkelje proceduriale, ndërsa tani cilësohet si bllokim politik. Në 2014, Shqipëria u ndalua padrejtësisht të eksportonte prodhime bujqësore në Rusi, për shkak se firma të vendeve të BE nën embargo kalonin prodhimet e tyre në Rusi, duke përdorur certifikata të falsifikuara shqiptare të printuara në vendet e tyre. Kjo na detyroi të nxjerrim certifikata me elemente të larta sigurie dhe problemi u zgjidh. Autoritetet ruse pranuan të rihapin eksportet. Tani bllokimi motivohet politikisht. Në shtator unë do të vizitojë Ukrainën për të nënshkruar marrëveshje për eksport masiv të frutave, perimeve dhe prodhimeve bujqësore të përpunuara. Këtë vit bujqësia ka shënuar një bum të paparë të eksporteve bujqësore,” deklaroi Panariti./K.P.