Këngëtari shqiptar Noizy dhe disa persona të tjerë, tri ditë më parë janë përfshirë në një rrahje në një nga diskotekat e Pejës.

Në lidhje me rastin ende nuk ka asnjë të arrestuar.

Zëdhënësi i Prokurorisë Themelore në Pejë, Shkodran Nikçi i ka bërë thirrje Noizyt dhe të tjerëve të lajmërohen në Polici ndërsa qytetarëve iu bën thirrje të njoftojnë Policinë për çdo informatë në lidhje me vendndodhjen e tyre.

“Nuk është paraqitur përkundër premtimeve që ka pas avokati i tij se do të paraqitet, nuk është paraqitur në stacionin policor për intervistim dhe për këtë çështje i bëjmë apel këngëtarit dhe gjithë personave të përfshirë në këtë vepër penale që të paraqiten tek organet hetuese. Përndryshe kërkojmë edhe ndihmën e gjithë qytetarëve të Republikës së Kosovës, veçanërisht kushdo që ka informata për vendndodhjen e tyre të bashkëpunojë ngushtë me policinë dhe prokurorinë dhe ju garantojmë që emri i tyre do të jetë konfidencial nëve na duhen vetëm informata”, ka thënë Nikçi për lajmi.net.

Këtë rast për lajmi.net para tri ditëve e konfirmuar edhe zëdhënësi i Policisë në Pejë, Fadil Gashi.

“Rreth orës 3:37 stacioni policor në Pejë është njoftuar nga spitali rajonal i Pejës se kanë pranuar dy persona të lënduar të cilët kanë kërkuar ndihmë mjekësore. Policia menjëherë ka dalë në vendin e ngjarjes ka kontaktuar me viktimat dhe të njëjtit kanë deklaruar se deri sa kanë qenë në një diskotekë, janë sulmuar nga persona të panjohur të cilët u kanë shkaktuar lëndime trupore dhe janë larguar në drejtim të panjohur. “Rasti është në fazën e hetimeve dhe nuk mund të japim emra, kanë qenë 7-8 persona që janë përfshirë në rrahje dhe janë të dyshuar por ende është herët për të dhënë konstatime, policia po punon për me i identifiku të dyshuarit. Deri më tash nuk kemi asnjë të arrestuar”, pati thënë Gashi për lajmi.net.