Këshilltarja e presidentes Vjosa Osmani, Donika Kadaj-Bujupi, ka reaguar ashpër ndaj deputetit të Lidhjes Demokratike të Kosovës (LDK), Avdullah Hoti, pas kritikave që ky i fundit adresoi ndaj Presidentes gjatë ditës së sotme.

Në një postim në rrjete sociale, Kadaj-Bujupi ka thënë se “Avdullah Hoti është njeriu i fundit në Kosovë që mund të flasë për moral politik”, duke e akuzuar atë se është bërë kryeministër “nëpërmjet shkeljes dhe keqpërdorimit të vullnetit qytetar, pa vota të tij dhe në mënyrë kundërkushtetuese”, transmeton lajmi.net.

“U nënshtrua para Vuçiqit për ata pak muaj sa ishte kryeministër; modeli i tij i politikbërjes është shembulli më i keq që qytetarët e kanë kuptuar moti se nuk duhet ta ndjekin”, ka shkruar ajo, duke shtuar se Hoti “edhe sot paska tentuar të mashtrojë sërish”.

Kadaj-Bujupi ka sqaruar se deklarata e Presidentes Osmani lidhur me buxhetin dhe vendimet në Kuvend është keqinterpretuar. Sipas saj, “votimi i zgjatjeve buxhetore, Planit të Rritjes, buxhetit të RTK-së, qindra milionave të Bankës Botërore, është çështje që varet nga vullneti i të gjitha partive politike të përfaqësuara në Kuvend, jo vetëm i njërës”.

Ajo shtoi se, meqë partitë opozitare nuk janë pajtuar që këto çështje të procedohen nga Qeveria në detyrë, presidentja ka propozuar që kjo të bëhet nga vetë Presidentja dhe deputetët, brenda kompetencave kushtetuese.
“Kjo gjë jo vetëm që lejohet, por është parashikuar në mënyrë taksative në Kushtetutë dhe në ligjet në fuqi”, ka theksuar Kadaj-Bujupi.

Në fund, ajo e ka akuzuar Hotin se “gënjen qytetarët pa pikë turpi” dhe se me qasjen e tij “rrezikon që Kosovës t’i humbin mbi 1 miliard euro dhe mijëra familje të mbeten pa paga, pa ushqim e pa barna”.
“S’i intereson, sepse prioritet e ka të sulmojë Presidenten – njësoj si atëherë kur thoshte se Vjosa Osmani do të marrë zero vota”, ka përfunduar këshilltarja presidenciale.

Ndërkohë, Avdullah Hoti më herët gjatë ditës kishte reaguar ndaj deklaratës së Presidentes Osmani për çështjet që presin shqyrtim në Kuvend, duke e quajtur atë “për keqardhje”.

Postimi i plotë: