Ministria e Infrastrukturës dhe Transportit ka njoftuar se nesër do të aplikohet kufizim i përkohshëm i qarkullimit për automjetet e transportit të mallrave me masë totale mbi 20 tonë.

Sipas MIT-it, kufizimi do të jetë në fuqi në autoudhë nga ora 11:00 deri në 17:30, për shkak të temperaturave të larta, të cilat sipas parashikimit zyrtar pritet të arrijnë në 32°C ose më shumë.

Ndërkohë, qarkullimi i automjeteve të rënda do të lejohet pa kufizime në rrugët nacionale, rajonale dhe lidhëse.

Nga ky kufizim përjashtohen automjetet e organeve të rendit dhe sigurisë publike, shërbimeve emergjente dhe institucioneve shëndetësore.

MIT-i u ka bërë thirrje operatorëve ekonomikë dhe ngasësve që ta respektojnë kufizimin dhe ta planifikojnë qarkullimin në përputhje me orarin e përcaktuar.