Sot është zhvilluar takimi mes përfaqësuesve të sindikatës së punëtorëve të ndërmarrjes “Pastrimi” dhe komunës së Prishtinës.

Përkundër që s’pati marrëveshje finale, për një nga kërkesat kryesore të sindikatës u arrit një marrëveshje, shkruan lajmi.net

Në komunikatën e lëshuar nga komuna thuhet se dy palët kanë nënshkruar kontratën për menaxhimin e mbeturinave sipërfaqësore, në vlerë prej 1.5 milionë euro.

Komunikata e plotë:

Sot është mbajtur një takim zyrtar ndërmjet përfaqësuesve të lartë të Kryeqytetit dhe përfaqësuesve të Sindikatës së Punëtorëve të Ndërmarrjes Rajonale “Pastrimi”, ku janë diskutuar kërkesat e parashtruara nga sindikata.

Njëra ndër kërkesat kryesore – kontrata për menaxhimin e mbeturinave sipërfaqësore, në vlerë prej 1.5 milionë euro, tashmë është nënshkruar nga të dyja palët.

Sa i përket kërkesave të tjera, përfshirë pagesën retroaktive për pesë muaj dhe nënshkrimin e kontratës bazike për shërbime të rregullta të grumbullimit të mbeturinave në territorin e Komunës së Prishtinës, është propozuar që të shqyrtohen mundësitë për zgjidhje brenda kompetencave ekzekutive dhe legjislative të Kryeqytetit, në përputhje me legjislacionin në fuqi.

Lidhur me zgjidhjen e statusit të ndërmarrjes, përfaqësuesit e ndërmarrjes janë njoftuar se është zhvilluar një takim i thirrur nga Kryetari i Kryeqytetit, z. Përparim Rama, me kryetarët e komunave tjera aksionare, të cilët kanë shprehur gatishmërinë për të inicuar menjëherë procedurat e decentralizimit të ndërmarrjes, në përputhje me legjislacionin në fuqi.

Kryeqyteti mbetet i përkushtuar për të trajtuar me seriozitet dhe përgjegjësi të gjitha çështjet që ndërlidhen me funksionimin e ndërmarrjes dhe mirëqenien e punonjësve të saj. Prandaj, konsiderojmë se grumbullimi i punëtorëve të KRM “Pastrimi” para objektit të Komunës është i panevojshëm.

Ndërkohë, grumbullimi i mbeturinave në gjithë territorin e Kryeqytetit, përfshirë edhe fshatrat përreth, po vazhdon të realizohet 24/7 përmes operatorëve të kontraktuar nga Komuna e Prishtinës, si masë e menjëhershme pas situatës emergjente të krijuar së fundmi./lajmi.net/