Presidenti Donald Trump tha sot se SHBA-ja mund ta “marrë nën kontroll” Ngushticën e Hormuzit nëse nuk arrin një marrëveshje me Iranin dhe kërcënoi delegacionin iranian që po negocion në Zvicër, shkruan CNN.

“Mund ta marrim nën kontroll Ngushticën, nëse duhet”, tha Trump gjatë një bisede telefonike 20-minutëshe me Fox News. “Nëse nuk bëjnë marrëveshje, ne do të mbledhim tarifa kalimi”.

Të shtunën, mediat shtetërore iraniane raportuan se komanda ushtarake e Iranit deklaroi se do ta mbyllë ngushticën për shkak të shkeljeve të pretenduara të armëpushimit në Liban nga Izraeli dhe për shkak të “dështimit” të SHBA-së për ta zbatuar pikën e parë të marrëveshjes paraprake për t’i dhënë fund luftës.

Gjatë bisedës me Fox News, Trump dukej se e kërcënoi me rifillimin e bombardimeve amerikane në Iran dhe ndaj negociatorëve iranianë që po takohen me zëvendëspresidentin JD Vance në Zvicër.

“E mbyllni atë dhe nuk do të keni më shtet”, tha Trump se u kishte thënë zyrtarëve iranianë lidhur me këtë rrugë ujore strategjike. “Madje nuk do të arrini as të ktheheni në dreq vendin tuaj”.

Trump përsëriti se beson që SHBA-ja mund të bëhet “engjëlli mbrojtës” i ngushticës dhe të marrë 20% të naftës që kalon përmes saj.

CNN ka kontaktuar Shtëpinë e Bardhë për më shumë detaje mbi atë se çfarë do të nënkuptonte marrja nën kontroll e ngushticës.

Trump kërcënoi sërish Iranin edhe për shkak të aleatëve të tij në Liban.

“Irani duhet t’i ndalojë menjëherë PROXIT e tij shumë të paguar në Liban që të shkaktojnë telashe”, shkroi Trump në Truth Social të dielën në mëngjes. “Nëse nuk e bëjnë këtë, do ta godasim Iranin përsëri shumë fort, ashtu siç bëmë javën e kaluar, vetëm se edhe më fort!!!”