Me këtë rast, Kryetarja e Komunës, Mimoza Kusari Lila, ka uruar hasjanët për këtë përfitim dhe ka theksuar se agrikultura është sektor shumë i rëndësishëm për punësim, duke u nisur edhe nga fakti se pa blegtori dhe bujqësi nuk mund të ketë zhvillim të mjaftueshëm në komunë.

“Ne jemi të vetëdijshëm për nevojat që ka Hasi dhe me këtë investim jemi munduar të kontribuojmë në këtë rajon. Po ashtu do të jemi të fokusuar edhe në projekte tjera të mëdha zhvillimore për banorët e këtij fshati”, ka thënë Kusari Lila.

Bekim Ermeni, Drejtor i Drejtorisë së Bujqësisë dhe të Zhvillimit Rural, ka pohuar se ky investim në ndërtimin e objektit si dhe pajisjen me aparaturë për funksionalizim, është bërë për faktin se Lipoveci dhe fshatrat përreth kanë kapacitete të mjaftueshme të qumështit.

“Në këtë mënyrë ulet kostoja e transportit si dhe arrihet një synim q? ? e kemi në përmirësimin e cilësisë së qumështit, njëkohësisht është një mbështetje edhe për qumështoren lokale ‘Golaj’”, ka thënë Ermeni.

Hysni Golaj, në emër të fshatit ka falënderuar Komunën e Gjakovës për këtë investim në blegtori dhe bujqësi, duke thënë se që nga paslufta ky është investimi i parë në këtë lëmi në rajonin e Hasit.

“Deri më tani jemi detyruar të bëjmë deri në dyzet kilometra rrugë për të dorëzuar qumështin, ndërsa tani kjo mund të bëhet në distancë maksimale prej shtatë kilometrave”, ka thënë Golak.

Edhe qytetari nga diaspora Dash Golaj është shprehur mirënjohës ndaj Komunës për këtë qendër të qumështit në Lipovec, duke theksuar: ”Më vjen shumë mirë që nuk e keni harruar Hasin, sepse janë njerëz që kanë vuajtur ndë r vite”.