Një situatë e pazakontë ka ndodhur me votat e diasporës për zgjedhjet parlamentare të Kosovës, të cilat do të mbahen më 9 shkurt 2025.

Disa nga fletëvotimet që kanë mbërritur nga votuesit jashtë vendit rezultojnë të jenë të pavlefshme, pasi i përkasin zgjedhjeve të kaluara.

Pamje dhe foto të këtyre fletëvotimeve janë shpërndarë në rrjete sociale, duke ngritur shqetësime në lidhje me procesin e votimit nga diaspora dhe administrimin e tij nga institucionet përgjegjëse.

Nuk dihet ende nëse bëhet fjalë për një gabim teknik, një problem me shpërndarjen e materialeve zgjedhore apo një keqkuptim nga vetë votuesit.

Në zgjedhjet e fundit parlamentare të vitit 2021, mbi 56 mijë vota të diasporës luajtën një rol të rëndësishëm në përcaktimin e rezultateve dhe formimin e qeverisë.

Këtë vit, duket se një numër i madh i tyre rrezikon të mos përfshihet në numërimin final për shkak të pavlefshmërisë së fletëvotimeve të dërguara.

Komisioni Qendror i Zgjedhjeve (KQZ) ende nuk ka dalë me një deklaratë të qartë mbi këtë situatë, por pritet që institucionet përkatëse të shqyrtojnë rastin dhe të japin sqarime për arsyet e këtij problemi.