Inspektorati Qendror i Punës ka urdhëruar ndalimin e punimeve në 12 objekte ndërtimi në Komunën e Rahovecit, pasi gjatë kontrolleve në terren janë evidentuar parregullsi në zbatimin e masave për sigurinë dhe shëndetin në punë.

Sipas njoftimit të këtij institucioni, inspektorët kanë konstatuar shkelje të kërkesave ligjore që kanë për qëllim mbrojtjen e shëndetit dhe sigurisë së punëtorëve në kantieret e ndërtimit, transmeton lajmi.net.

Për këtë arsye, punimet në 12 objektet përkatëse janë ndërprerë deri në korrigjimin e shkeljeve të evidentuara dhe përmbushjen e kushteve të përcaktuara me ligj për sigurinë në vendin e punës.

Inspektorati ka bërë të ditur se kontrollet do të vazhdojnë edhe në ditët në vijim, me synimin e parandalimit të rreziqeve dhe sigurimit të kushteve të përshtatshme për punëtorët./lajmi.net/