Deputeti i Kuvendit të Kosovës nga PDK, Rrustem Mustafa ka shkruar në lidhje me situatën politike në vend.

Ai ka thënë se para se të jetë politikan, është dëshmitar i rrugëtimit të shtetit të Kosovës që nga ditët më të vështira në luftë.

“Kam shërbyer këtu edhe në dy mandate të tjera. Kam parë plagët, kam parë gëzimet, kam parë lotët e nënave që u kthyen në buzëqeshje kur më në fund pamë flamurin tonë të ngritur lart. Sot, kur shoh tryezën e Kuvendit bosh dhe qeverinë ende të paformuar pas më shumë se katër muajsh, më vjen rëndë. Jo për veten time. Por për atë nënë në Gjakovë që nuk ka ilaçe për fëmijën e sëmurë. Për atë të riun në Mitrovicë që po paketon valixhen sepse nuk sheh të ardhme këtu. Për atë punëtorin në Malishevë që rrugët e dëmtuara ia kanë konsumuar makinën dhe shpresën”, ka shkruar Mustafa.

Ai ka thënë se sot po flet si një njeri që e do këtë vend mbi çdo gjë tjetër.

“Arsyeja ime e parë: Unë e di se koalicionet e mëdha funksionojnë, sepse i kam jetuar. Kur u formua koalicioni PDK-LDK, shumë thoshin se nuk do të zgjaste. Se inatet ishin të mëdha. Se diferencat ishin të pakapërcyeshme. Por ne atëherë vendosëm të mos dëgjojmë zërat e dyshimit. Vendosëm të dëgjojmë zërin e atdheut. Dhe çfarë ndodhi? E shpallëm Pavarësinë e Kosovës. Ato duar që kishin mbajtur pushkën, ato duar që kishin shkruar peticione e kishin fshirë lotët për të rënët, nënshkruan aktin më të shenjtë të historisë sonë shtetërore. Ndërtuam autostradat që sot lidhin Kosovën me bregun e Adriatikut, i dhanë frymë ekonomisë sonë dhe afruan njerëzit. Bëmë shkolla, spitale e ura. Gjurmë që nuk fshihen, gjurmë që sot fëmijët tanë i shohin dhe thonë: “Këtë e bënë prindërit tanë.””, ka shkruar Mustafa.

Ai ka thënë se koalicionet e mëdha nuk janë luks por domosdoshmëri shtetërore.

“Tani para nesh kemi dy forcat më të mëdha politike: Lëvizjen Vetëvendosje dhe Partinë Demokratike të Kosovës. E di që mes nesh janë thënë fjalë të ashpra. E di që ka mosbesim. E di që zemrat janë djegur nga retorika e luftës politike. Por më lejoni t’ju them jotokësisht diçka: Kosova nuk është pronë e asnjë partie. Kosova është shtëpia e të gjithëve. Unë nuk po ju kërkoj të harroni të kaluarën. Unë po ju kërkoj të mos lejoni që e kaluara t’ju mbajë peng të ardhmes. Ne nuk kemi kohë për inate, nuk kemi kohë për hakmarrje dhe as për “nëse” apo “por”. Sepse jashtë kufijve, qytetarët tanë nuk i pyesin nëse janë me PDK-në apo me LVV-në; ata thjesht thonë se janë nga Kosova”, ka shkruar Mustafa.

Ai ka thënë se ka parë çfarë ndodh kur prishin ura dhe dështojnë të bashkohen,

“Kam parë cikle të pafundme zgjedhore. Kam parë deputetë që betohen për mandat, e pastaj shkojnë sërish në zgjedhje pa lënë asnjë gjurmë apo kontribut. Dhe ku na çoi kjo? Rinia jonë iku. Më të mirët tanë sot janë në Gjermani, Zvicër e Britani. Atje, nëpër kafene të huaja, flasin për Kosovën me mall, por nuk kthehen sepse nuk kanë ku të kthehen. A mund të jetoj me veten duke e ditur se e kisha fuqinë të ndryshoja diçka dhe nuk veprova? Unë nuk mundem”, ka shkruar Mustafa.

Ai i ka bërë një thirrje kryetarëve të PDK-së dhe VV-së.

“Ju ftoj të uleni në një tryezë. Jo si kundërshtarë, jo si rivalë, por si burra shteti që kanë për detyrë t’ua lënë fëmijëve tanë një Kosovë më të mirë. Le t’i lëmë mënjanë egot. Le t’i lëmë mënjanë fjalët e ndezura të së kaluarës. Le të flasim për rrugët, për shkollat, për spitalet dhe për mirëqenien e qytetarëve tanë. Nëse e bëjmë këtë, historia do të na kujtojë — jo për fjalimet apo grindjet tona, por për punët dhe urat që ndërtuam. Kosova nuk ka më kohë për të pritur. Unë jam gati të jap të gjithë përvojën time për këtë bashkim. A jeni gati edhe ju?”, ka shkruar Mustafa. /Lajmi.net/

Postimi i plotë: