Ministri i Bujqësisë, Pylltarisë dhe Zhvillimit Rural, Armend Muja, ka pritur në takim të ngarkuarën me punë në Ambasadën e Shteteve të Bashkuara të Amerikës në Prishtinë, znj. Annu Prattipati.

Gjatë takimit u diskutua për bashkëpunimin e ndërsjellë në fushën e bujqësisë, me theks të veçantë në avancimin e projekteve që kontribuojnë në zhvillimin e qëndrueshëm të sektorit dhe në rritjen e kapaciteteve institucionale.

Me këtë rast, znj. Prattipati e uroi ministrin Muja për detyrën e re, duke theksuar se Shtetet e Bashkuara të Amerikës mbeten një partner kyç në mbështetjen e Ministrisë së Bujqësisë, Pylltarisë dhe Zhvillimit Rural përmes projekteve dhe iniciativave të ndryshme zhvillimore.

Ministri Muja e falënderoi znj. Prattipati për mbështetjen e vazhdueshme dhe bashkëpunimin e deritanishëm, duke theksuar rëndësinë e thellimit të mëtejmë të partneritetit në funksion të zhvillimit të sektorit të bujqësisë dhe përmirësimit të mirëqenies së fermerëve në Republikën e Kosovës.

Në përmbyllje, Ministri Muja shprehu mirënjohjen e tij të veçantë për Shtetet e Bashkuara të Amerikës për kontributin e tyre të vazhdueshëm ndaj Republikës së Kosovës, duke theksuar rolin e tyre si partner strategjik në zhvillimin institucional dhe ekonomik të vendit.

Të dy palët u pajtuan për vazhdimin e bashkëpunimit dhe koordinimin e aktiviteteve të përbashkëta në të ardhmen.