Kryetari i Shoqatës së Naftëarëve Fadil Berjani thotë se përgjegjësinë për cilësinë e naftës në Kosovë e ka Ministria e Tregtisë dhe Industrisë.

Në një intervistë për “Tribuna”, Berjani ka thënë se trupat inspektues nga MTI nuk bëjnë kontrollin e cilësisë së naftës, por vetëm lëshojnë një certifikatë konformiteti për të cilën duhet paguar 59 euro.

“Ju lutem cilësia e naftës në Kosovë duhet të jetë me standarde evropiane 10PPM, por fajtor për moscilësinë është barrë të cilën duhet ta bartë Ministria e Tregitisë dhe Industrisë, e cila me trupat inspektues plaçkit. Shumë pak mostra merr në kufi, afërsisht 5 për qind të importit”.

“Trupat inspektuese lëshojnë certifikatat e konformitetit. Këto janë “KPU inspekt & Pan Adriatika”. Ato vetëm bëjnë një plaçkë të autorizuar nga MTI, ku vetëm për leximin e një certifikate paguajnë 59 euro dhe nuk testojnë cilësinë”.

“Ne si shoqatë kemi kërkuar largimin e trupave inspektuese dhe kemi kërkuar stacionimin e laboratorëve në kufi që të kontrollohet cilësia ndërsa certifikatën që janë duke  e lëshuar trupat inspektuese, duhet të vazhdojë ta kryejë Dogana e Kosovës, e cila e ka kryer këtë punë deri tash”.

I pyetur se sa naftë futet kontrabandë në Kosovë dhe nga cilët rrugë, Berjani ka thënë se për sa naftë hyn në Kosovë duhet pyetur Qeveria.

“Pika 1 dhe 31 ka qenë dhe Mitrovica e veriut, ku është bërë kontrabanda por ju duhet këtë pyetje t’ia drejtoni Qeverisë”, tha për “Tribuna”, Fadil Berjani.