Trajneri i SL Benfica, Jose Mourinho, ka mohuar se ka pasur bisedime me Real Madrid për një rikthim në “Santiago Bernabeu” këtë verë, mes raportimeve që e vendosin atë si favorit për të zëvendësuar Alvaro Arbeloa. Trajneri portugez konsiderohet si një nga kandidatët kryesorë, në një situatë ku ende nuk ka dalë një emër i qartë për këtë post.

Ideja e emërimit të Jurgen Klopp është hedhur poshtë sërish këtë javë, ndërsa Mourinho është një nga disa emrat e lidhur me këtë detyrë, përfshirë Massimiliano Allegri, Mauricio Pochettino dhe Unai Emery. Megjithatë, së fundmi duket se Mourinho është preferenca e presidentit të Real Madridit, Florentino Perez.

“Jo, askush nga Real Madridi nuk ka folur me mua, këtë mund ta garantoj. Kam shumë vite në futboll, ashtu si ju në gazetari, dhe jemi mësuar me këto gjëra, por nuk ka asgjë nga Real Madridi,” deklaroi Mourinho të premten, sipas Marca.

Ai u pyet sërish për këtë çështje, por mbeti i prerë se nuk ka pasur asnjë kontakt me “Los Blancos”.

“Asgjë. Nuk kam çfarë të shtoj më shumë. I kam thënë edhe kolegut tuaj që, sa i përket Real Madridit, nuk ka asgjë, ndërsa për Benficën, e dini situatën. Kam edhe një vit kontratë me Benficën dhe kaq,” shtoi ai.

Raportimet sugjerojnë se Florentino Perez është figura kryesore pas lidhjeve me Mourinhon, dhe këtë javë emri i tij është nxjerrë në media edhe për të testuar reagimin publik. Të dy kanë pasur një marrëdhënie të afërt gjatë periudhës së parë të Mourinhos te Real Madridi (2009-2013).

Presidenti i klubit thuhet se po udhëheq personalisht procesin për gjetjen e zëvendësuesit të Alvaro Arbeloa, por deri tani nuk ka një opsion të qartë. Një nga pikëpyetjet rreth Mourinhos mbetet reagimi i tij ndaj incidentit racist ndaj Vinicius Junior në “Estadio da Luz” këtë sezon, ndërsa sipas raportimeve, dhoma e zhveshjes së Real Madridit nuk është shumë e interesuar për rikthimin e tij.