Zëvendëskomandanti i Policisë  për rajonin e Veriut të Kosovës, Besim Hoti, ka thënë se situata në ditën kur po zhvillohen zgjedhjet e jashtëzakonshme  në Veri të Mitrovicës është e qetë dhe se deri më tani nuk është shënuar asnjë incident.

Në një prononcim për lajmi.net, Hoti është shprehur se Policia e Kosovës në kuadër të planit operativ ka angazhuar rreth 250 pjesëtarë të policisë për të mbuluar të gjitha vendvotimet.

Sipas tij, të gjitha njësitet operative do të jenë të gatshme t’i përgjigjen çdo veprimi, me qëllim që të ruhet rendi publik.

“Situata që nga fillimi është e qetë pa ndonjë incident.  Qysh në orët e hershme të mëngjesit kur kemi filluar në zbatim të planit të veprimit, në përcjellje të materialit zgjedhor dhe sigurimit të vendeve të votimit, pastaj hapja e qendrave të votimit dhe procesi i fillimit të votimit, çdo gjë ka kaluar pas asnjë incident deri në këtë moment”.

“Janë angazhuar rreth 250 pjesëtarë të policisë së Kosovës në kuadër të planit operativ, por sigurisht që të gjitha këto vendvotime do të mbulohen nga pjesëtarët e policisë, njësi të cilat janë të gatshme t`i përgjigjen çfarëdo lloj natyre, qoftë ruajtjes së rendit publik, apo të hetimit të ndonjë vepre penale, në rast se është e nevojshme”, ka thënë Hoti për lajmi.net.