Ministria e Industrisë, Ndërmarrësisë, Tregtisë dhe Inovacionit (MINTI) ka njoftuar se ka intensifikuar procesin e verifikimit të njehsorëve elektrikë, pas themelimit të një komisioni ad hoc për trajtimin e ankesave të konsumatorëve.

Sipas njoftimit zyrtar, verifikimet laboratorike të kryera në Agjencia e Metrologjisë së Kosovës kanë nxjerrë disa gjetje kryesore. Është konstatuar se një pjesë e njehsorëve kanë pasur afat të skaduar të vlefshmërisë, ndërsa janë evidentuar edhe devijime kohore – prej 2–3 ditësh dhe deri në 10–11 orë krahasuar me kohën reale, transmeton lajmi.net.

Megjithatë, autoritetet theksojnë se matja e energjisë elektrike ka rezultuar e saktë dhe nuk ka ndikuar në konsum të regjistruar. Po ashtu, është vërtetuar se bllombat e njehsorëve kanë qenë të paprekura dhe pa dëmtime.

Pas këtyre gjetjeve, MINTI ka paralajmëruar se do t’i kërkojë Zyra e Rregullatorit të Energjisë (ZRRE) ndërmarrjen e masave përkatëse. Ndërkohë, Inspektorati Qendror i Mbikëqyrjes së Tregut (IQMT), duke u bazuar në legjislacionin në fuqi, pritet të shqiptojë gjoba ndaj KEDS si pronar dhe operator i njehsorëve, për rastet kur është konstatuar skadimi i vlefshmërisë.

Në aspektin e ankesave, MINTI bën të ditur se deri më 30 mars 2026 nuk ishte regjistruar asnjë ankesë për njehsorët elektrikë. Megjithatë, vetëm gjatë dy ditëve të fundit pas krijimit të komisionit, janë pranuar 209 ankesa, të cilat aktualisht janë në proces verifikimi.

Ministria ka ritheksuar përkushtimin për të trajtuar çdo ankesë të konsumatorëve në mënyrë të bazuar në fakte dhe në përputhje me ligjin. Njëkohësisht, u është bërë thirrje qytetarëve që të paraqesin ankesat e tyre përmes emailit zyrtar, duke përfshirë të dhënat e kontaktit dhe adresën e banimit, në mënyrë që procesi i verifikimit të zhvillohet sa më shpejt dhe me efikasitet.

Komunikata e plotë: