Me Vuçiqin vjen në Kosovë edhe ministri i Brendshëm dhe ai i Mbrojtjes
Kryeministri i Serbisë, Aleksandar Vuçiq, gjatë vizitës që do t’i bëjë Kosovs, të mërkurën, do të shoqërohet edhe nga disa anëtarë tjetër të kabinetit të tij, përfshi edhe ministrin e Brendshëm, Nebojsha Stefanoviq dhe atë të Mbrojtjes, Branisllav Gashiq.
![](https://lajmi.net/wp-content/uploads/media/image/201501/full/80078700_80085100.jpg)
Lajme
Sipas burimeve të lajmi.net, përveç kryeministrit serb, leje për të vizituar Kosovën të mërkurën kanë kërkuar edhe disa ministra të Qeverisë së Serbisë, por ende nuk është bërë e qartë nga autoritetet shtetërore të Kosovës nëse “viza” do t’ju jepet të gjithë atyre që kanë kërkuar ta shoqërojnë Vuçiqin.
“Nuk kemi për qëllim të pengojmë vizitën e delegacionit serb në shtetin e Kosovës, porse secilën leje e kemi shqyrtuar veç e veç, dhe për këtë tashmë për shumicën e tyre kemi kthyer përgjigje pozitive”, ka thënë një zyrtar i Qeverisë së Kosovës i mirinformuar me agjendën e vizitës së kryeministrit serb.
Vuçiq të mërkurën do të qëndrojë në disa lokalitete të Kosovës të banuara edhe nga pakica serbe, si në Pasjan, Shtërpcë dhe Graçanicë, ndërsa eskorta e tij e perbërë prej pesë veturash, sipas burimeve të lajmi.net do të shoqërohet edhe nga Policia e EULEX-it, më qëllim që t’ju ikët procedurave të gjata në pikën kufitare Serbi-Kosovë.