Mbyllen shkollat në ishujt grekë pasi shirat e dendur përmbytën rrugët
Ishujt grekë janë përfshirë nga një mot i rëndë me reshje të dendura dhe erëra të forta, duke shkaktuar probleme serioze, sidomos në rrjetin rrugor. Në Naousa të Parosit, rrugët janë shndërruar në lumenj të rrëmbyeshëm, duke marrë me vete dhjetëra makina të parkuara dhe duke shkaktuar dëme materiale të konsiderueshme. Autoritetet kanë njoftuar se…

Bota
Ishujt grekë janë përfshirë nga një mot i rëndë me reshje të dendura dhe erëra të forta, duke shkaktuar probleme serioze, sidomos në rrjetin rrugor.
Në Naousa të Parosit, rrugët janë shndërruar në lumenj të rrëmbyeshëm, duke marrë me vete dhjetëra makina të parkuara dhe duke shkaktuar dëme materiale të konsiderueshme.
Autoritetet kanë njoftuar se shkollat do të qëndrojnë të mbyllura jo vetëm në Paros, por edhe në ishujt Mykonos, Symi, Kos dhe Rodos. Banorët e Hios, Samos dhe Ikaria janë paralajmëruar të kufizojnë lëvizjet për shkak të kushteve ekstreme të motit.
Sipas meteorologëve, vetëm në disa orë në Mykonos janë regjistruar 100 mm shi për metër katror, ndërsa në Naousa të Parosit 70 mm.
Shërbimi Kombëtar i Motit ka parashikuar që reshjet dhe erërat e forta deri në 74 km/h do të vijojnë të paktën për 48 orët e ardhshme. Në disa zona, përfshirë Chania të Kretës, janë raportuar përmbytje të mëdha.
Zyrtarët lokalë kanë konfirmuar se nuk ka raportime për të lënduar, ndërsa ekipet emergjente kanë ndërhyrë për të shpëtuar tre persona të bllokuar në makina në zonat e përmbytura. Autoritetet u kanë bërë thirrje qytetarëve të shmangin lëvizjet e panevojshme për të evituar rreziqet.