Të dhënat e gjurmimit detar dhe mediat shtetërore iraniane kanë njoftuar se mesatarisht 20 deri në 30 anije tregtare dhe cisterna nafte kanë kaluar me sukses nëpër Ngushticën e Hormuzit brenda 24 orëve.

Lëvizjet e anijeve zhvillohen nën kushte të rrepta, ku kërkohet autorizim paraprak. Anijet duhet të marrin leje dhe të koordinohen me Marinën e Korpusit të Gardës Revolucionare Iraniane (IRGC).

Edhe pse është shënuar një fluks i konsiderueshëm i anijeve, ai mbetet dukshëm më i ulët krahasuar me periudhën para konfliktit, kur në këtë zonë kalonin mbi 130 anije në ditë.

Zona vazhdon të mbetet e militarizuar. Raportohet se anijet që përpiqen të kalojnë pa koordinim me autoritetet iraniane janë ndaluar ose detyruar të kthehen prapa.

Nga ana tjetër, Shtetet e Bashkuara kanë vendosur bllokadë ndaj porteve iraniane dhe kanë sanksionuar autoritetin e sapokrijuar të ngushticës nga Irani, i cili synon të mbledhë tarifa transiti për kalimin nëpër këtë rrugë strategjike detare.