Manchester United ka arritur marrëveshje me Monacon për blerjen e sulmuesit Radamel Falcao për 56 milionë euro, pas skadimit të periudhës së huazimit në fund të këtij sezoni, ka bërë të ditur “Goal.com”.

Falcao iu bashkua gjigantit anglez gjatë afatit kalimtar të verës në formë huazimi njëvjeçar por klubi nga Old Trafford ka opsionin për blerjen e tij në fund të këtij sezoni.

Dhe, United ka vendosur ta shfrytëzojë atë pasi menaxheri Louis van Gaal është ndarë i kënaqur nga mënyra e adaptimit të Falcaos në skuadër.

Falcao aktualisht përfiton rreth 305 mijë funte në javë dhe United ka arritur marrëveshje me Monacon që ai nga edicioni i ardhshëm të jetë në tërësi pronë e klubit anglez.