Komuna e Malishevës ka bërë gati rreth 4 milionë euro për investime kapitale brenda vitit 2014.

Sipas zyrtarëve të kësaj komune prioritet pritet të jenë investimet në rregullimin e infrastrukturës, investimet në arsim, përmirësimi i shërbimeve administrative, mirëmbajtja e mjedisit dhe një fushatë kundër etheve hemorragjike, problem me të cilin komuna e Malishevës përballet tash e disa vjet, raporton Zëri.

Drejtori për Buxhet dhe Financa, Vesel Krasniqi, ka thënë se Komuna ka bërë gati 4 milion euro për investime kapitale.

“Fondi i paraparë, parashihet të shpenzohet për ndërtimin e pesë shkollave, pastaj rregullimin e infrastrukturës si dhe një pjesë edhe për fushatën kundër etheve hemorragjike”.

Zyrtarët e Malishevës, përfshirë edhe të parin e Komunës Ragip Begajn, kanë organizuar disa takime me banorë të fshatrave për t`I njohur ata me planet e institucioneve komunale për strategjinë e masave mbrojtëse kundër rriqrave.