Macron i ashpër ndaj tarifave të Trumpit: Është vendim brutal dhe i pabazuar

Presidenti i Francës, Emmanuel Macron, ka reaguar ashpër ndaj tarifave të vendosura nga ish-presidenti amerikan Donald Trump, duke theksuar se ai është në përputhje të plotë me liderët e Bashkimit Evropian që “asgjë nuk mund të përjashtohet” në përgjigje të veprimeve të Trump, pasi “të gjitha mundësitë janë në tryezë”. Në një deklaratë publike, Macron…

Bota

03/04/2025 18:28

Presidenti i Francës, Emmanuel Macron, ka reaguar ashpër ndaj tarifave të vendosura nga ish-presidenti amerikan Donald Trump, duke theksuar se ai është në përputhje të plotë me liderët e Bashkimit Evropian që “asgjë nuk mund të përjashtohet” në përgjigje të veprimeve të Trump, pasi “të gjitha mundësitë janë në tryezë”.

Në një deklaratë publike, Macron ka theksuar se Evropa duhet të veprojë me masa efektive dhe proporcionale, por gjithashtu të dërgojë një mesazh të qartë që nuk do të lejojë që sektorët e ekonomisë të bëhen viktima të këtyre tarifave.

“Ne duhet të bëjmë çdo gjë që është efektive dhe më proporcionale, por gjithashtu të tregojmë qartë se jemi të vendosur që të mos lejojmë që këta sektorë të bëhen viktima të këtyre tarifave,” ka deklaruar ai.

Presidenti francez ka përmendur gjithashtu mundësinë e ndërhyrjes në sektorët e shërbimeve digjitale, një fushë ku Shtetet e Bashkuara përfitojnë shumë nga Evropa.

Macron ka sugjeruar gjithashtu një rishikim të investimeve franceze në Shtetet e Bashkuara derisa tarifat të qartësohen.

Ai ka bërë thirrje për unitet mes liderëve të Bashkimit Evropian, duke i inkurajuar ata që të mos bien në tundimin e veprimeve të izoluara, por që të shfrytëzojnë madhësinë e tregut evropian për të formuluar një përgjigje të fuqishme.

Në një fjalim të mbajtur të enjten, Macron e ka cilësuar vendimin e Trump “brutal dhe të pabazuar”, duke shprehur shqetësimin për ndikimin masiv që tarifat do të kenë në Francë, në territoret e saj jashtë shtetit, si dhe në Evropë në tërësi.