LVV dhe LDK me hapa larg njëra-tjetrës, prishet koalicioni në Prizren

Lajme

05/06/2020 22:44

Këtë e ka bërë të ditur kryetari i kësaj komune, Mytaher Haskuka nëpërmjet një postimi në Facebookun e tij, shkruan lajmi.net.

Ai ka shkruar se kjo vjen si pasojë e zhvillimeve të fundit, mocionit të mosbesimit dhe krijimit të qeverisë së re nga LDK-ja.

Më tutje, Haskuka konstaton se pas këtyre zhvillimeve nuk ka mbetur hapësirë për bashkëpunim midis këtyre dy partive dhe kështu thotë se nuk ka koalicion midis këtyre dy partive në këtë komunë tash e tutje.

Muaj më parë, nga një çarje midis këtyre dy subjekteve në komunën e Prizrenit që ishin në koalicion, Partia Demokratike e Kosovës mori kryesimin e Kuvendit Komunal, tash, LVV do të jetë e vetme në komunë, pa partnerë.

Ky është njoftimi i plotë i Haskukës:

NJOFTIM!

Të nderuar qytetarë,

Dua t’ju njoftoj që si pasojë e zhvillimeve të fundit, mocionit të mosbesimit ndaj qeverisë LVV-LDK dhe krijimit të një qeverie e cila është në kundërshtim me vullnetin demokratik të shprehur më 6 tetor, unë e kam të pamundur vazhdimin e koalicionit në Komunën e Prizrenit.

Pas zhvillimeve në Asamblenë Komunale në shkurt të këtij viti, unë jam munduar që të gjej mënyra për të vazhduar koalicionin, duke besuar që rruga në shtetndërtimin e Kosovës dhe krijimin e institucioneve përgjegjëse që bazohen në profesionalizëm dhe promovojnë demokracinë dhe zhvillimin, mund të bëhet vetëm me një bashkëpunim të sinqertë ndërmjet Lëvizjes VETËVENDOSJE! dhe Lidhjes Demokratike të Kosovës.

Por besimi dhe pritjet e mia si shumë qytetarë të Kosovës nuk u realizuan.

Mendoj që koalicionet duhet të bazohen në besimin e ndërsjellë dhe në këtë aspekt pas zhvillimeve të fundit nuk ka mbetur hapësirë për të vazhduar rrugëtimin tonë.

Dua të falënderoj drejtorët komunalë nga LDK-ja dhe asamblistët e LDK-së për bashkëpunimin e deritanishëm dhe punën në përmbushjen e programit qeverisës në nivelin lokal.

Shpresoj që forcat demokratike brenda LDK-së që nuk janë të shantazhuara, do të vazhdojnë përpjekjet e tyre që LDK-në ta kthejnë në një parti ku vendos demokracia, e jo një grusht njerëzisht që ndoshta nga interesat e tyre apo nga shantazhet janë të lidhur me fatin e një Presidenti, që për të shpëtuar veten po e katandisë Kosovën me Listën Serbe.

Mbetshi me shëndet!. /Lajmi.net/