Limaj: Dështimi i Rezolutës për Srebrenicën, lajm i turpshëm nga Nju Jorku
Kryetari i Nismës për Kosovën, Fatmir Limaj ka reaguar pas dështimit të miratimit të Rezolutës në Këshillin e Sigurimit për gjenocidin serb në Srebrenicë. Të kujtojmë se kjo Rezolutë nuk kaloi pasi që Rusia vendosi veto.
Lajme
Limaj përmes një postimi në Facebook ka thënë se ky është lajm i turpshëm dhe se Serbia nuk po arrin të distancohet nga krimet e para 20 vitesh.
Lexojeni postimin e plotë të Limajt në Facebook:
Serbia edhe sot gjykon regjimin e Millosheviqit pse i ka humbur luftërat, e jo pse i ka shkaktuar ato luftëra dhe krime ndaj popujve në ish Jugosllavi.
Lajm i turpshëm nga New Yorku, dështoj miratimi i rezolutës për Srebrenicën që cilësonte gjenocid atë që kishin bërë atje forcat serbe para 20 viteve.
Ofensiva diplomatike serbe kundër kësaj rezolute e mbështetur nga Rusia edhe njëherë tregoj se Serbia jo vetëm që nuk është distancuar nga e kaluara kriminale, por për më tepër ajo demonstroj se nuk pranon gjenocidin që kanë bërë forcat serbe në Srebrenicë.
Në lidhje me këtë rezolutë, që ishte sponsorizuar nga Britania e Madhe, debati dhe mohimi që është bërë këto ditë në Beograd besoj mjafton për të parë se në atë vend asgjë nuk ka ndryshuar, madje serbët ndihen keq dhe e gjykojnë pushtetin serb të Millosheviqit për luftërat që i ka humbur, e jo për shkaktimin e këtyre luftërave dhe krimet e vuajtjet që ju ka shkaktuar popujve në ish-Jugosllavi.
Dështimi i kësaj rezolute po paraqitet si fitore e madhe e Serbisë në të gjitha mjetet e informimit serb dhe nga e gjithë elita politike e intelektuale atje.