Volodymyr Zelensky, Keir Starmer, Emmanuel Macron, Friedrich Merz dhe Donald Tusk kanë zhvilluar një telefonatë me presidentin amerikan Donald Trump, tha një zëdhënës i presidentit ukrainas, raporton Telegraph.

Kryeministri i Mbretërisë së Bashkuar u tha gazetarëve në Tiranë se udhëheqësit diskutuan bisedimet e fundit të paqes me homologun e tyre amerikan.

“Pozicioni rus është qartësisht i papranueshëm”, theksoi Starmer. “Ne po i koordinojmë dhe i përshtasim përgjigjet tona dhe do të vazhdojmë ta bëjmë këtë”.

Volodymyr Zelensky e ka akuzuar Vladimir Putin-in se ka “shumë frikë” për të marrë pjesë në bisedimet e paqes në Turqi.

Duke folur së bashku me Keir Starmer dhe Emmanuel Macron në Tiranë, Zelensky tha: “Këtë javë, patëm një shans të vërtetë për të ecur drejt përfundimit të luftës – sikur Putini të mos kishte pasur frikë të vinte në Turqi”.

“Isha atje i gatshëm për një takim të drejtpërdrejtë me të për të zgjidhur të gjitha çështjet kryesore. Ai nuk pranoi asgjë”, ravijëzoi kreu i shtetit.