Avokatët e Sean “Diddy” Combs kanë bërë thirrje që artistit t’i jepen jo më shumë se 14 muaj burgim kur të dënohet muajin tjetër, që do të thotë se ai do të lirohet pothuajse menjëherë.

Në një parashtresë të re ligjore me shkrim, ekipi mbrojtës gjithashtu detajoi kushtet “çnjerëzore” në Qendrën e Paraburgimit në Brooklyn, duke thënë se ushqimi ndonjëherë përmban krimba dhe se reperi i nënshtrohet rregullisht dhunës. Poashtu sipas ekipit mbrojtës, ai nuk ka marrë frymë në ajër të pastër për gati 13 muaj.

Combs, 55 vjeç, u shpall fajtor për dy akuza të lidhura me prostitucionin pas gjyqit të tij të profilit të lartë në verë, por u lirua nga akuzat më serioze të trafikimit seksual dhe komplotit të shantazhit.

Ai tashmë ka vuajtur një vit në paraburgim në Neë York pas arrestimit të tij në shtator të vitit 2024 dhe do të dënohet më 3 tetor. Avokatët e tij mbrojtës tani kanë paraqitur argumentet e tyre për dënimin në një parashtresë me shkrim drejtuar gjyqtarit Arun Subramanian, i cili dëgjoi gjyqin.

“Në dy vitet e fundit, karriera dhe reputacioni i Combs janë shkatërruar”, thanë avokatët e tij në dokument.

Ata thanë se Combs është “ndëshkuar në mënyrë adekuate” tashmë, pasi është burgosur në “kushte të tmerrshme”. Ai gjithashtu është i kthjellët “për herë të parë në 25 vjet” dhe ka pasur një “precedent pa incidente”, shtuan ata, dhe ka ndihmuar të burgosurit e tjerë duke krijuar një program edukativ mbi menaxhimin e biznesit dhe sipërmarrjen.

Tani është koha që reperi “të shkojë në shtëpi tek familja e tij, në mënyrë që të mund të vazhdojë trajtimin e tij dhe të përpiqet të shfrytëzojë sa më shumë kapitullin tjetër të jetës së tij të jashtëzakonshme”, tha ekipi i mbrojtjes.

Parashtresa e mbrojtjes ofron informacione të reja rreth asaj se si ka qenë jeta pas hekurave për Combs, një artist fitues të çmimit Grammy dhe themelues i Bad Boy Records, i cili ishte një nga prodhuesit më me ndikim të hip-hopit të viteve 1990 dhe 2000, dhe për familjen dhe bashkëpunëtorët e tij të mëparshëm.

Reperi u detyrua të largonte më shumë se 100 punonjës nga bizneset e tij pas arrestimit, tha ekipi, dhe shumë prej tyre nuk kanë mundur të gjejnë punë për shkak të lidhjes së tyre të mëparshme me të.

Shtatë fëmijët e Combs janë përballur gjithashtu me “pasoja shkatërruese”, sipas dosjes ligjore, duke përfshirë humbjen e mundësive të biznesit në aktrim, televizion, modë dhe muzikë