Kryeministri i Kosovës, Albin Kurti, ka pritur sot në takim një delegacion të nivelit të lartë të NATO-s dhe Bashkimit Evropian, të kryesuar nga admirali Giuseppe Cavo Dragone, kreu i Komitetit Ushtarak të NATO-s, dhe gjenerali Sean Clancy, kryetar i Komitetit Ushtarak të BE-së.

Sipas njoftimit nga Zyra e Kryeministrit, në takim është diskutuar për gjendjen e sigurisë në Kosovë dhe në rajon, si dhe për thellimin e bashkëpunimit me aleatët ndërkombëtarë.

Kurti ka shprehur mirënjohje për angazhimin e NATO-s në ruajtjen e paqes dhe stabilitetit në Kosovë, duke theksuar rëndësinë e pranisë së misionit të KFOR-it.

“NATO-ja për Kosovën nuk është vetëm garantuese e sigurisë, por edhe orientim strategjik dhe destinacion,” ka theksuar ai, duke e lidhur këtë me aspiratat euroatlantike të vendit.

Në takim është diskutuar gjithashtu situata e fundit në veri të Kosovës dhe zhvillimet në rajon, ku Kurti, sipas njoftimit, ka përmendur edhe shqetësimet për ndikime destabilizuese.

Po ashtu, është theksuar bashkëpunimi ndërmjet Forca e Sigurisë së Kosovës dhe NATO-s si një element kyç për forcimin e kapaciteteve të sigurisë dhe rritjen e ndërveprimit institucional me aleatët ndërkombëtarë. /Lajmi.net/