Kryeministri në detyrë, Albin Kurti, u ka uruar mirëseardhje bashkatdhetarëve që kanë ardhur për pushime në Kosovë, duke theksuar se prania e tyre gjallëron vendin gjatë sezonit veror.

Në mbledhjen e Qeverisë, e cila është duke u zhvilluar, Kurti tha se ardhja e mërgatës ndihet në çdo komunë të Kosovës.

“E dashur mërgatë. Ditët e verës tek ne janë ditët e ardhjes suaj në vendlindje. Ardhja juaj e ka gjallëruar vendin dhe kjo vërehet në secilën komunë. Mirë se keni ardhur dhe mirë se jeni në atdheun tuaj. Ju urojmë pushim të këndshëm.”, tha ai, transmeton lajmi.net.

Në të njëjtën kohë, ai bëri thirrje për kujdes të shtuar në komunikacion, duke pasur parasysh numrin e aksidenteve të regjistruara ditët e fundit.

“Të dashur qytetarë, ditëve të fundit po dëgjojmë për aksidente të shumta në trafik. Ju bëj thirrje për kujdes të shtuar, sikurse i bëj thirrje Policisë së Kosovës të shtojë veprimet në drejtim të parandalimit të shkeljes së rregullave që mund të çojnë në aksidente.”, u shpreh Kurti

Kurti theksoi se respektimi i rregullave të trafikut dhe angazhimi i institucioneve janë të domosdoshme për rritjen e sigurisë në rrugët e Kosovës, veçanërisht gjatë sezonit veror kur fluksi i automjeteve është më i madh./lajmi.net/