Këto dy komisione për përcaktimin e vijës kufitare mes Kosovës dhe Malit të Zi janë takuar herën e fundit vjeshtën e kaluar dhe është krijuar përshtypja se marrëveshja ka qenë pothuajse e arritur.

Mirëpo, njëri prej anëtarëve të komisionit kosovar e ka përmbysur tërë procesin.

“S’ka dhe nuk mund të ketë asnjë marrëveshje për demarkacionin e kufirit në brezin kufitar përgjatë territorit të Komunës së Pejës me Malin e Zi”, thotë përfaqësuesi i Komunës së Pejës, në komisionin kosovar, Ali Lajçi.

Ai ka detyrën e vëzhguesit dhe këshilltarit në Komisionin e Kosovës për Demarkacionin e Kufirit me Malin e Zi.

Arsyeja e refuzimit, sipas Lajçit, është plani i njëanshëm i Malit të Zi për vijën kufitare dhe ky version, siç tha ai, kurrë nuk do të pranohet.

“Takimet e deritashme janë të pavlefshme dhe kurrë nuk do të pranohet asnjë version pa pajtimin e banorëve”, tha Lajçi për Tribunën.

Në këtë mënyrë, ai paraqet jo vetëm qëndrimin e vet, por edhe të banorëve që kanë prona të veta në atë zonë, të cilat i kanë takuar Kosovës edhe në të kaluarën, dhe të cilat prej shekujsh janë të rugovasve.