Kriza politike thellon krizën sociale

8:18 | 24 Janar 2016

Varferi, foto ilustruese

Të dhënat e agjencive vendore dhe ndërkombëtare deklarojnë se niveli i varfërisë në Kosovë prek rreth 40 për qind të qytetarëve.

Shumica prej tyre janë të papunë dhe të diplomuar, ndërsa llogaritet se në vit 25 deri në 30 mijë të rinj janë të aftë për punë.

Gjendja e rëndë sociale po shtyn kosovarët që të braktisin vendin. Në kërkim të një jete më të mirë për shkollim dhe shërbime shëndetësore kualitative për fëmijët e tyre, janë familjet e reja kosovare ato që duan të ikin nga vendi, duke u orientuar për ndonjë vizë tek ambasadat e vendeve perëndimore.

Sipas një ankete të gazetës, nëpër barnatoret e Prishtinës afër QKUK-së, në deklarimet e tyre punonjësit konfirmojnë se 30 për qind e klientëve nuk kanë të holla të blejnë barnat.

Disa zgjedhin nga recetat e mjekut të blejnë vetëm ato barna pa të cilat nuk bën fare siç janë ato që ndalin dhimbjen kurse të tjerat nuk i marrin…

Në sektorin e arsimit sipas përfaqësuesve të sindikatës, gjendja po rëndohet pasi që një pjesë e mësimdhënësve që vuajnë nga sëmundje të ndryshme dalin para nxënësve në atë gjendje në pamundësi për të marrë pensionin e parakohshëm, ligj ky që nuk ka kaluar ende në Kuvend.

Një mësimdhënës në Ferizaj vitin e kaluar, sipas të dhënave të Sindikatës së Arsimit, ka ndërruar jetë para nxënësve në klasë.

Kriza institucionale e krijuar tash e sa muaj në Kuvendin e Kosovës ka lënë pa miratuar shumë ligje që lidhen me mirëqenien e qytetarëve./zeri