Krasniqi: Kushtetuesja e vulosi që VV e ka mbajtur peng Kuvendin – Ata që zgjodhën krizën, dështuan, ne që zgjodhëm Kushtetutën, fituam

Lajme

08/08/2025 14:33

Kryetari i Partisë Demokratike të Kosovës, Memli Krasniqi, ka komentuar vendimin e fundit të Gjykatës Kushtetuese, duke theksuar se ky është një konfirmim i bllokadës së qëllimshme dhe shkeljeve të Lëvizjes Vetëvendosje në Kuvendin e Kosovës.

Sipas tij, për muaj me radhë VV-ja ka penguar funksionimin normal të institucioneve për interesa të ngushta politike, duke vepruar jashtë Kushtetutës, transmeton lajmi.net

Në aktgjykimin e 7 gushtit 2025, Gjykata Kushtetuese shpalli të pavlefshme të gjitha veprimet parlamentare të periudhës nga 27 qershori deri më 26 korrik, duke konstatuar se deputetët nuk kanë zbatuar vendimin e mëparshëm dhe se Komisioni për Votim të Fshehtë ishte i jashtëligjshëm.

Krasniqi e konsideron këtë një fitore të madhe për rendin kushtetues dhe demokracinë në Kosovë.

Ai nënvizon se për gjashtë muaj qytetarëve u mohua përfaqësimi dhe institucioneve iu pengua funksionimi, duke krijuar një krizë që ka dështuar përballë besimit dhe angazhimit të Grupit Parlamentar të PDK-së për t’i dhënë fund kësaj situate përmes rrugës ligjore.

Memli Krasniqi thekson se Kosova ka nevojë për institucione funksionale dhe lidership që respekton rregullat dhe Kushtetutën, duke nënvizuar se PDK-ja do të qëndrojë gjithmonë në mbrojtje të rendit kushtetues dhe interesit të qytetarëve.

Postimi i plotë:

Sot, Gjykata Kushtetuese vulosi të vërtetën që për muaj me radhë e kemi thënë me zë të lartë, si Parti Demokratike e Kosovës: Lëvizja Vetëvendosje e ka mbajtur peng Kuvendin e Republikës së Kosovës, duke e bllokuar qëllimisht dhe në mënyrë të planifikuar funksionalizimin e tij për interesa të ngushta pushteti, me veprime tërësisht jashtë kushtetutës.

Me Aktgjykimin e 7 gushtit 2025, Gjykata shpalli të pavlefshme të gjitha veprimet parlamentare arbitrare nga 27 qershori deri më 26 korrik; konstatoi se deputetët nuk kanë zbatuar vendimin kushtetues të 26 qershorit; se veprimet e Kryesuesit të seancës ishin antikushtetuese; dhe se Komisioni për Votim të Fshehtë ishte i jashtëligjshëm.

Ky është konfirmim i plotë se bllokada, shkeljet dhe veprimet arbitrare të Lëvizjes Vetëvendosje ishin jo vetëm antikushtetuese, por edhe thellësisht të dëmshme për demokracinë dhe shtetin tonë.

Për gjashtë muaj, qytetarëve iu mohua përfaqësimi, institucioneve iu ndal funksioni, e vendit iu imponua stagnimi.

Përballë kësaj sjelljeje, ne zgjodhëm rrugën e maturisë, ligjshmërisë dhe besimit në Kushtetutë. Si Grup Parlamentar i PDK-së, e ndërmorëm këtë nismë me përgjegjësi të plotë ndaj qytetarëve dhe rendit kushtetues. Me besim të palëkundur në të drejtën dhe në Kushtetutën e vendit, iu drejtuam Gjykatës Kushtetuese për t’i dhënë fund kësaj krize të qëllimshme dhe të rrezikshme për demokracinë.

Kosova nuk mund të ecë përpara me institucione të paralizuara dhe me rregulla të shkelura sipas tekave të pushtetit. Prandaj, le të jetë ky një mësim i qartë për të gjithë, e veçanërisht për ata që nuk kanë ditur kurrë ta respektojnë shtetin: Kosova ka nevojë për institucione funksionale dhe për lidership që respekton rregullat, jo që i shkel ato për pushtet. Ne do të jemi gjithmonë në anën e Kushtetutës dhe të qytetarëve.

Ky vendim është fitore për rendin kushtetutes, për Kuvendin dhe për qytetarët e Republikës së Kosovës. Ata që zgjodhën krizën, dështuan. Ne që zgjodhëm Kushtetutën, fituam./lajmi.net/