Komuna e Prishtinës i ka kërkuar Agjencisë Kadastrale të Kosovës ndërmarrjen e masave urgjente për përshpejtimin e trajtimit të lëndëve pronësore gjatë sezonës verore, me qëllim të uljes së vonesave dhe përmirësimit të shërbimeve për qytetarët.

Sipas Komunës së Prishtinës, aktualisht një numër i konsiderueshëm i lëndëve po përballen me vonesa për shkak të ngarkesës së sistemit. Një ndër problemet kryesore është se lëndët që kthehen për plotësim te noterët rikthehen sërish në radhën e pritjes sipas datës fillestare të aplikimit, duke shkaktuar bllokime dhe duke ngadalësuar trajtimin e rasteve të tjera, transmeton lajmi.net.

Për këtë arsye, Drejtoria e Kadastrit, Gjeodezisë dhe Legalizimit ka kërkuar që në periudhën nga 1 qershori deri më 1 shtator të lirohet përkohësisht radhitja automatike e lëndëve, në mënyrë që rastet në procedurë të përpunohen më shpejt dhe të zvogëlohen afatet e pritjes.

Komuna vlerëson se kjo masë është veçanërisht e rëndësishme për bashkatdhetarët që gjatë muajve të verës qëndrojnë për një periudhë të shkurtër në Kosovë dhe synojnë të përfundojnë procedurat pronësore brenda afateve të arsyeshme.

Po ashtu, Kryeqyteti ka kërkuar përmirësime teknike në sistem, që zyrtarët të njoftohen menjëherë kur noterët plotësojnë komentet e kërkuara, si dhe të shmanget trajtimi i së njëjtës lëndë nga më shumë se një zyrtar në të njëjtën kohë.

Komuna e Prishtinës ka theksuar se mbetet e përkushtuar për ofrimin e shërbimeve më efikase dhe reduktimin e vonesave të panevojshme për qytetarët.