Ushtarët e caktuar në Komandën Rajonale-Perëndim (RC-W), në kuadër të misionit të KFOR-it të udhëhequr nga NATO, kanë zhvilluar një stërvitje me helikopterë në kampin Villaggio Italia në Pejë, me synim rritjen e gatishmërisë operacionale dhe forcimin e koordinimit ndërmjet forcave ajrore dhe atyre tokësore.

Stërvitja është fokusuar në skenarë të ndryshëm, përfshirë transportin e personelit, evakuimin mjekësor dhe reagimin në situata emergjente. Sipas njoftimit të KFOR-it, aktivitete të tilla ndihmojnë në ruajtjen e vetëdijes situative dhe përgatitjes së lartë të trupave për ndërhyrje të shpejtë në çdo rrethanë.

KFOR ka theksuar se përmes këtyre ushtrimeve vazhdon të dëshmojë angazhimin e tij për garantimin e një mjedisi të sigurt për të gjithë qytetarët në Kosovë.

Misioni i KFOR-it vepron në bazë të Rezolutës 1244 të Këshillit të Sigurimit të OKB-së të vitit 1999 dhe ka për detyrë të kontribuojë në sigurinë dhe lirinë e lëvizjes në vend. Në këtë drejtim, KFOR bashkëpunon ngushtë me Policinë e Kosovës dhe EULEX-in, si pjesë e mekanizmave të sigurisë në vend. /Lajmi.net/