Këshilli për Marrëdhëniet Shqiptaro-Amerikane, është shprehur se po i ndjekin zhvillimet në Kosovë, duke shprehur shqetësimin e thellë lidhur me bllokadën e krijuar në kuvend.

Në reagimin e Këshillit thuhet edhe se vendimi i Gjykatës Kushtetuese është një mundësi për të zhbllokuar procesin politik në vend. Nga ta është vlerësuar edhe që kjo ‘’paralizë’’ e institucioneve është e pajustifikueshme.

E njëjta, ka vlerësuar ky Këshill, e minon besimin e publikut dhe e dobëson shtetin duke e lënë Kosovën të pambrojtur në një kontekst global të paqëndrueshëm.

‘‘DEKLARATË NGA KËSHILLI PËR MARRËDHËNIET SHQIPTARO-AMERIKANE

Vendimi i Gjykatës Kushtetuese: Një Mundësi Thelbësore për të Zhbllokuar Procesin Politik në Kosovë

Këshilli për Marrëdhëniet Shqiptaro-Amerikane po ndjek nga afër zhvillimet në Kosovë dhe mbetet thellësisht i përkushtuar për të mbështetur çdo përpjekje që forcon institucionet demokratike të Kosovës dhe pozitën e saj ndërkombëtare—veçanërisht partneritetin e qëndrueshëm me Shtetet e Bashkuara të Amerikës. Jemi thellësisht të shqetësuar nga bllokimi i vazhdueshëm politik dhe nga dështimi për të konstituuar Kuvendin në përputhje me vullnetin e qytetarëve. Kjo paralizë institucionale është e pajustifikueshme. Ajo minon besimin e publikut, dobëson shtetin dhe e lë Kosovën të pambrojtur në një kontekst global gjithnjë e më të paqëndrueshëm’’, thuhet në reagim.

Më tej, Këshilli për Marrëdhëniet Shqiptaro-Amerikane, e ka përshëndetur edhe aktygjkimin e Gjykatës Kushtetuese, duke thënë se vendimi në fjalë ofron rrugë të zbatueshme përpara.

Në komunikatë, thuhet edhe se partitë parlamentare duhet të bien dakord për zgjedhjen e kryetarit të Kuvendit pa vonesa të mëtejshme.

‘‘Përgëzojmë Gjykatën Kushtetuese për vendimin e saj në kohën e duhur dhe përshëndesim njohjen nga ana e aktorëve kryesorë politikë se ky vendim ofron një rrugë të zbatueshme përpara. Kosova ka një traditë të krenuar të respektimit të sundimit të ligjit dhe autoritetit kushtetues—edhe ky moment kërkon të njëjtën përkushtim. Nxisim të gjitha partitë parlamentare që të hyjnë në mbledhjen e ardhshme me ndjenjën e urgjencës dhe unitetit, dhe të bien dakord për zgjedhjen e Kryetarit të Kuvendit dhe formimin e qeverisë së re pa vonesa të mëtejshme. Vendi duhet të ecë përpara’’, shtohet në komunikatë.

Tutje, theksohet edhe se mbështetja nga ana e Shteteve të Bashkuara të Amerikës është jetike, porse e njëjta kërkon qeverisje efektive dhe bashkërendim të qëndrueshëm.

Kësisoj, vijohet në reagim, institucionet e Kosovës duhet të tregojnë pjekuri dhe vendosmëri për të përmbushur këtë moment.

‘‘Mbështetja e Shteteve të Bashkuara është jetike—por ajo kërkon qeverisje efektive dhe bashkërendim të qëndrueshëm. Institucionet e Kosovës duhet të tregojnë pjekuri dhe vendosmëri për të përmbushur këtë moment. Këshilli mbetet plotësisht i përkushtuar për të shërbyer si një urë lidhëse mes Kosovës dhe Shteteve të Bashkuara, si dhe për të përforcuar zërin e popullit dhe institucioneve të Republikës së Kosovës’’, përfundohet në komunikatë.