Policia e Kosovës ka evidentuar katër raste të dhunës në familje gjatë 24 orëve të fundit, të raportuara në Ferizaj–Prishtinë, Podujevë, Pejë dhe Gjakovë.

Në njërin prej rasteve, një shtetase e Shqipërisë u sulmua fizikisht nga i dashuri i saj pas një mosmarrëveshjeje, ndërsa në një rast tjetër në Podujevë, një grua raportoi se vazhdimisht është viktimë e dhunës psikike nga bashkëshorti, transmeton lajmi.net.

Dhunë në familje u raportua edhe në Pejë, ku një grua deklaroi se ishte sulmuar fizikisht nga bashkëshorti i saj, ndërsa në Gjakovë një burrë, nën ndikimin e alkoolit, dyshohet se ushtroi dhunë psikike ndaj bashkëshortes.

Nga katër rastet e raportuara, një i dyshuar është dërguar në mbajtje, ndërsa tre të tjerë janë liruar në procedurë të rregullt, sipas vendimeve të prokurorit.

Rastet e raportuara të dhunës në familje:

• Autostrada Ferizaj–Prishtinë (14.07.2026, ora 05:40) – Një shtetase e Shqipërisë u sulmua fizikisht nga i dashuri i saj, shtetas i Kosovës, pas një mosmarrëveshjeje. Viktima mori trajtim mjekësor. I dyshuari u arrestua dhe më pas u lirua në procedurë të rregullt.
• Podujevë (14.07.2026, ora 09:00) – Një grua raportoi se në vazhdimësi përjeton dhunë psikike nga bashkëshorti. I dyshuari u intervistua dhe u lirua në procedurë të rregullt.
• Pejë (13.07.2026, ora 20:00) – Një grua raportoi se u sulmua fizikisht nga bashkëshorti. Nuk u raportuan të lënduar, ndërsa pas intervistimit të palëve, rasti vazhdon në procedurë të rregullt.
• Gjakovë (14.07.2026, ora 08:30) – Një burrë, i dyshuar se ishte nën ndikimin e alkoolit, ushtroi dhunë psikike ndaj bashkëshortes. Ai u arrestua dhe, me vendim të prokurorit, u dërgua në mbajtje./lajmi.net/