Policia Kufitare në pikën kufitare të Morinës ka arrestuar një shtetas turk të shpallur në kërkim ndërkombëtar nga autoritetet turke, si rezultat i kontrolleve të shtuara për parandalimin e paligjshmërive dhe lëvizjeve ilegale.

I arrestuari është Tahsin Yazici, 22-vjeç, banues në Turqi, i cili është ndaluar në hyrje të Shqipërisë nga Kosova.

Sipas verifikimeve, ai ishte shpallur në kërkim nga Interpol Ankara, pasi Gjykata e Shkallës së Parë në Gaziosmanpasa, Turqi, e ka dënuar me 4 vjet e 2 muaj burgim, për veprën penale “Mbajtja e paligjshme e armëve të zjarrit”.

Arrestimi i tij u krye nga shërbimet e Policisë Kufitare në bashkëpunim me Drejtorinë Vendore të Policisë Kukës, ndërsa Interpol Tirana ka nisur procedurat për ekstradimin e të riut drejt Turqisë.