Dhjetëra tifozë të Kupës së Botës 2026 kanë mbetur pa bileta, pavarësisht se i kishin blerë me muaj më parë përmes platformës StubHub.

Shumë prej tyre udhëtuan mijëra kilometra dhe shpenzuan mijëra dollarë për fluturime e akomodim, por biletat iu anuluan në momentet e fundit.

Sipas ekspertëve, problemi lidhet me praktikën e njohur si “shitja spekulative”, ku shitësit ofrojnë bileta që ende nuk i kanë në pronësi. Kur çmimet rriten, ata anulojnë shitjen për t’i rishitur më shtrenjtë.

Një prej këtyre rasteve ishte ai i Sergio Enrique Alvarado Montalvos i cili pagoi 1,700 dollarë në StubHub për t’i bërë një surprizë babait të tij me bileta për Kupën e Botës.

Por, pasi udhëtoi me prindërit e tij nga Meksika drejt Dallasit për ndeshjen Argjentinë-Austri dhe shpenzoi afro gjashtë mijë dollarë për fluturime dhe hotele, familja mbeti e bllokuar jashtë portave të stadiumit.

Kësisoj, dy tifozë kanë ngritur një padi kolektive ndaj StubHub, duke e akuzuar kompaninë se nuk dorëzoi biletat e paguara.

Ata pretendojnë se kanë pësuar humbje të mëdha financiare, ndërsa StubHub nuk ka komentuar mbi padinë.