Autoriteti i Konkurrencës ka refuzuar ftesën për takim që ka pranuar nga LDK-ja, që do të marrin pjesë edhe komuniteti i biznesit, ZRrE-ja dhe deputetë të partive parlamentare, lidhur me vendimin për kalimin e bizneseve në tregun e hapur të energjisë elektrike.

Në komunikatën zyrtare lëshuar nga Autoriteti i Konkurrencës, thuhet se vendimi për mospjesëmarrje është i bazuar në mandatin kushtetues dhe ligjor të Autoritetit të Konkurrencës, si dhe në nevojën për ruajtjen e pavarësisë dhe paanshmërisë institucionale, e cila është shtyllë themelore për funksionimin dhe integritetin e institucionit.

“Bazuar në nenin 21, paragrafi 1 të Ligjit Nr. 08/L-056 për Mbrojtjen e Konkurrencës, Autoriteti është agjenci e pavarur, që për punën e vet i përgjigjet Kuvendit të Republikës së Kosovës. Më tej, paragrafi 3 i
këtij neni përcakton qartë se: “Ndalohet çdo ndërhyrje, politike, publike ose private që mund të cenojë pavarësinë ose paanshmërinë e Autoritetit”.  Kjo dispozitë nënvizon domosdoshmërinë që Autoriteti të veprojë vetëm mbi bazën e ligjit dhe të kompetencave të tij, pa u përfshirë në formate politike, debate ad-hoc apo iniciativa të cilat nuk zhvillohen në përputhje me strukturat zyrtare shtetërore”, thuhet në komunikatë.

Autoriteti i Konkurrencës, gjithashtu ka thënë se në situatën në të cilën ndodhet Kuvendi, i cili nuk është konstituuar, Autoriteti nuk është në pozitë institucionale për të ndër vepruar me grupe parlamentare, deputetë individualë apo organizime me natyrë politike jashtë kuadrit formal të Kuvendit.

“Autoriteti i Konkurrencës mbetet i përkushtuar të veprojë në mënyrë profesionale, të paanshme dhe objektive, duke garantuar mbrojtjen e konkurrencës së lirë dhe funksionimin e tregut sipas parimeve ekonomike dhe të ligjshmërisë. Theksojmë se bashkëpunimi i Autoritetit me institucionet shtetërore po ndodh dhe po zhvillohet në çdo kohë, brenda kornizës së mandatit ligjor dhe në funksion të interesit publik, e posaçërisht në momentin kur të rikthehet funksionimi i rregullt i Kuvendit të Republikës së Kosovës”, thuhet mes tjerash ne komunikatë. /Lajmi.net/